CEBU, Philippines - Usa ka 21-anyos nga dalagang dunay deperensiya sa pangisip ang namabdos tungod sa giingong pagsigeng lugos sa iyang kaugalingong uyoan niadtong Martes sa buntag sa usa sa mga barangay sa lungsod sa Daanbantayan.
Ang pamilya sa biktima wala makahibalo nga buntis diay og tulo ka buwan ang biktima kung wala kini magping-it sa kasakit sa iyang tiyan niadtong Huwebes sa udto ug dihang gisukitsukit mitug-an kini sa gipangbuhat kaniya sa uyoan.
Sa gihimong follow up operation sa kapulisan nadakpan ang suspek sa panimalay niini. Matud ni PO1 Faith Rodrigo, Women’s and Children’s Protection Desk, nga niadtong Martes sa buntag giingong katapusang gilugos sa suspek ang biktima diha sa kasagbutan nga dili layo sa balay niini.
Si Rodrigo midugang nga ang biktima mibutyag nga makadaghan nang higayong gilugos sa suspek ang biktima hangtud nga namabdos kini.
Nasuta usab ni Rodrigo bisan mga silingan sa suspek nakamatikod na usab sa kadudahang linihokan niini matag magkuyog sa biktima.
Ang biktima gidala sa pink room sa Don Vicente Sotto Memorial Medical Center alang sa usa ka medical check up samtang kasong rape ang giprepara sa kapulisan alang sa suspek nga nagtingkagol na sa karsel. ( /EIM) - BANAT NEWS