MASBATE CITY, Philippines – Gitapos na ang search and retrieval operations sa Masbate sa nahitabong plane crash nga mikalas kang Interior Secretary Jesse Robredo niadtong Sabado human molutaw sa dagat ang patay’ng lawas sa Nepalese co-pilot kagahapon.
Ang patay’ng lawas ni Kshitiz Chand nakit-ang naglutaw sa usa ka ferry boat nga miagi duol sa crash site sa Masbate Bay.
Si Defense Secretary Voltaire Gazmin mitug-an sa mga tigbalita nga ang amahan ug igsuon ni Chand maoy positibong miila sa lawas.
“Chand’s body was found within the general vicinity of the crash site. He was wearing a white pilot uniform with pilot wing pinned on the chest line,” matud pang Gazmin.
Sumala pa ni Gazmin ang MV Cooperative, nga usa ka pasaheroan padulong sa Sorsogon nga gi-kapitan sa usa ka Tom de los Santos maoy mi-turnover sa patay’ng lawas ngadto sa Philippine Navy gunboat nga naglibotlibot sa dapit.
Kahinumdoman nga niadto pang milabay’ng Martes daan nang mipahibalo si transportation and communications secretary Mar Roxas nga usa ra ka piloto ang nakit-an diha sa sulod sa abyon ilawom sa dagat dihang unang naugkat si Robredo.
Sumala pang Gazmin alas 7:45 sa buntag dihang nasigpatan ang lawas.
Tungod sa pagkakaplag sa katapusang sakay sa Piper Seneca plane sa Aviatour gipahibalo ni Gazmin nga natapos na ang retrieval operations ug magsugod na ang Civil Aviation Authority of the Philippines (CAAP) sa imbestigasyon sa nahitabo.
Unang naugkat ang lawas ni Robredo niadtong Martes, samtang ang piloto ug tag-iya sa Aviatour nga si Capt. Jessup Bahinting naugkat niadtong Miyerkules gibanabanang 180 ka tiil o 59 ka metros sa ilawom sa dagat.
Ang abyon kansang naguhayguhay na ang lawas gidala usab sa baybayon.
“With this development (pagkakita kang Chand). We shall now conclude the Search and Operations (SAR). We condole with the families of Secretary Robredo, Mr. Jessup Bahinting and Mr. Kshitiz Chand,” matud pang Gazmin.
Lakip sa moimbestigar sa hitabo ang kapolisan mangolekta sa mga ebidensya ug mga testimonya ilabi na gikan sa survivor nga si Chief Insp. June Paulo Abrazado.
Hinuon giklaro niyang ang CAAP ra maoy dunay control sa imbestigasyon pagsuta sa hinungdan sa pagkahagsa.
Lakip sa susihon kung duna ba kini transporder o depektoso ra gyud sanglit dako unta kini og natabang sa pagpangita. Susihon usab ang mga pamaagi sa aircraft maintenance sa Aviatour, abilidad sa mga mekaniko, piloto ug uban pa.
Gikatakdang ipadala sa America ang makina sa maong abyon aron ipasusi sa mga eksperto kung unsay nahitabo niini.
Nagpasalamat usab si Gazmin sa tanang mga mitabang sa operasyon nga gilangkuban sa Navy, Air Foce, kapolisan, Coast Guard, Red Cross, lokal ug langyaw’ng volunteer divers sa ilang pagtabang. (Philippine Star News Service/EIM)