CEBU, Philippines - Usa ka call center agent ang gisikop sa Casuntingan Police Station sa siyudad sa Mandaue tungod sa pasangil nga misuway unta og among-among sa 19- anyos nga katabang niadtong Lunes sa gabii diha sa may barangay Upper Tingub, Mandaue City.
Ang 25-anyos nga suspek gisikop human ang mga silingan niini mitawag sa kapolisan dihang nakadungog sa singgit sa 19-anyos nga katabang sa suspek nga nangayo og tabang.
Ang biktima misaysay sa kapolisan nga una pa niini, gisugo siya sa suspek pagpalit og beer ug nag-inusarang miinom samtang nagtan-aw og salida. Wala diha ang asawa ug anak sa suspek tungod kay mibakasyon.
Tungod kay katulogon naman ang biktima ug diha ra man kini magtulogan sa sala mihigda kini samtang nagtan-aw ang suspek og salida apan mao na lay namat-an niini gipawong sa suspek ang suga ug nabatyagan niini nga may mipatong kaniya ug nagpanghikap sa pribado niyang lawas.
Dihang huboan na unta kini milighot ang biktima ug nidagan sa gawas dayong singgit pagpangayo og tabang hinungdan sa pagsikop sa suspek samtang gipaabot pa kining pasakaan og kaso. - BANAT NEWS