CEBU, Philippines - Gawas sa paghatud sa hustong kaalam bahin sa paggamit sa kuryente, ang Visayan Electric Company (VECO) mihatag usab sa ilang mga pahimangno kalabot kung unsaon nga ang mga konsumedor sa kuryente makadaginot sa ilang bayranan matag buwan.
Si Dennis Garcia ang presidente sa VECO mipagawas sa pipila ka kasayoran aron ang mga tawo makadaginot sa ilang balayranan sa kuryente
Pipila niini mao nga kung magpasiga og suga kinahanglang mogamit og bombilya nga ubos og wattage.
Pagngon kini kun wala na kinahanglana ug kanunay kining limpyohan aron kanunay kining hayag tungod kay ang buling nga mamilit motibhang sa kasanag og 50 porsyento o katunga sa kahayag.
Ikaduha kun magtan-aw og telebisyon, siguraduhon nga maayo ang telebisyon tungod kay kun aduna kini daot mas kalas kini og kuryente ug nga kinahanglang pagngon ang TV kun way magtan-aw.
Ikatulo kun magluto kinahanglang likayan ang pagpawong-pawong ug pasiga sa electric stove, tapukon ang tanang mga sagol nga gamiton sa dili pa magsugod sa pagluto, gamiton ang mga kaha nga flat ang lubot ug hugot ang takob aron malikayan ang paghungaw sa init.
Likayan ang paggamit sa dako nga heating stove coil alang sa gamay nga kaha o kaserola, i-switch ang electric stove sa low kun magsugod na og bukal ang pagkaon ug nga pagngon ang electric stove sa katapusang pipila ka minutos sa pagluto.
Ikaupat kun mogamit og electric fan kinahanglang i-set kini sa low, i-lock ang oscillator kun ang mogamit usa o duha lang ka tawo ug pagngon kini kun di na gamiton.
Ika-lima mao nga kung mogamit og plantsa, sa imong pagwisik-wisik og tubig sa utawunon nga sapot, butangan kini sa igo lang nga gidaghanon sa tubig tungod kay mas kalas sa kuryente kun sobra ra ang umog sa sapot. Ibton ang plantsa pipila ka minutos sa di pa mahuman sa pagpangutaw tungod kay igo ra kaayo ang kainiton sa plantsa aron ang namlantsa makahuman sa pagpangutaw.
Matud pa ni Garcia nga ang VECO nangusog sa pagpatukod sa ilang VECO Development Academy (VDA) didto sa barangay Sirao sa syudad sa Sugbo alang sa mga empleyado niini ilabi na sa anaa sa mga departamento sa engineering, customer service, linesmen ug admin-support aron ilang masinati ang maayong kalidad sa pagbansay-bansay uban ang kompletong teknolohiya.
Midugang siya nga ila gayud nga gipaninguha nga makab-ot ang labing maayong serbisyo ug labaw sa tanan ilang kustomer ug mga trabahante gikan sa kapeligro sa kuryente. – BANAT NEWS