CEBU, Philippines - Patay na si interior secretary Jesse Robredo dihang nahaw-as sa kadagatan sa Masbate City sa gilawmong 180 ka tiil samtang gihunong una ang search and retrieval operations kagahapon human usa sa mga German volunteer deep-sea divers ang nadisgrasya.
Si Secretary Mar Roxas sa Department of Transportation and Communications sayo kagahapon sa buntag emosyonal nga mipahibalong nakit-an na ang lawas sa abyon niadto pang Lunes sa gabii ginamit ang mga side-scan sonars.
Pinaagi niini natultulan sa mga rescuers ang abyon nga ilang gipa-check sa remotely operated vehicle (ROV) nga dunay camera human sa kompirmasyon nga kini mao ang nahagsang Piper Seneca ug nakita usab sa mga deep-sea divers ang mga patay’ng lawas ni Robredo. Ang mga deep-sea divers na maoy mikuha sa patay’ng lawas ni Robredo.
Si Roxas, sa report sa GMA News Online kagahapon nga mikutlo sa report gikan sa GMA News TV Balitanghali, usa pa lang ka piloto ang nakit-an sa ilawom ug kinahanglan pang pabalikon ang ROV aron masusi og maayo ang fuselage sa abyon nga naugbok sa balas.
Duna say ubang mga report nga nag-ingong nakit-an na ang duha ka mga piloto diha sa sulod sa abyon.
Giplanohan unta kagahapon nga ipasaka pinaagi sa pagbira ang tibuok lawas sa abyon apan dihang gisuwayan na og bira ang barko nangabugto ang tulo ka dagkong pisi nga gihikot sa mga divers.
Ang pilotong si Capt. Jessup Bahinting ug Nepalese co-pilot nga si Kshitiz Chand gipaabot nga mahaw-as karong adlawa. Ang pamilya ni Chand nagpaabot og impormasyon diha sa command center sa Masbate.
Gumikan kay naugbok man sa balas ang cockpit sa maong abyon bugtong ang patay’ng lawas lang ni Robredo ang unang naugkat ug gikarga dayon sa barko sa Philippine Coast Guard ug gisulod kini sa body bag ug gidala sa pantalan sa Masbate dayon sa punerarya ug gikarga sa C-130 Hercules transport aircraft sa Philippine Air Force ngadto sa Naga City.
Mikuyog sa paghatud sa patay’ng lawas sa kalihim si Presidente Benigno Aquino III aron personal nga ipaabot ang pahasubo ngadto sa banay’ng Robredo. Base sa mga TV footage sa nagkadaiyang TV stations gisugat og gatosang mga Bicolano ang patay’ng lawas ni Robredo diha pa lang sa airport nga nagdala og placards nga nag-ingong “we love you pogi.”
Apan samtang gihikutar na sa Malacañang ang pagpangandam sa haya ni Robredo nagkaaberya ang nagpadayong operasyon kagahapon sa pag-ugkat sa nahabiling patay’ng lawas nila ni Bahinting ug Chand tungod sa pagkadisgrasya sa German deep-sea diver volunteer nga si Danny Brumbach.
Matud pa nga paspas ang pagsaka ni Brumbach gikan sa ilawom maong naigo kini og decompression sickness ug gidala sa tambalanan apan gibalibaran tungod kay walay kahimanan ang tambalanan sa Masbate nga makatabang sa maong langyaw.
Usa sa mga barkong Search and Rescue sa Philippine Coast Guard nga miapil sa operasyon adunay decompression chamber maong gibalik si Brumbach didto ug base sa uwahing report giingong makaestorya na kini.
Tungod sa maong hitabo gihunong una ang search and retrieval operations sa duha ka nahibiling piloto base sa rekomendasyon sa kadagkoan sa mga divers nunot sa kapeligro sa kinabuhi sa mga divers nga magdugay sa gilawmong 180 ngadto sa 200 ka tiil.
Agi og pagbangutan sa trahedya gimando sa Malacañang pagbutang sa Bandila sa Pilipinas sa half-mast. (Wires/EIM) (BANAT)