CEBU, Philippines - Makaluluoy ang kahimtang sa usa ka lalaking giingong adunay deperensiya sa pangisip kinsa gipatay sa wala pa mailhing kriminal kagahapon sa buntag sa Barangay Tag-ubi, Compostela.
Ang biktima nga si Nathaniel Lato, 32, nakit-an na lang sa sulod sa usa ka sako nga adunay upat ka samad pinusilan ug ingon man gigulgol pa gyud ang liog niini.
Ang patay’ng lawas niini nakit-an gibanabanang 150 metros gikan sa iyang panimalay.
Katapusang nakit-an si Lato niadtong Domingo sa gabii nga nagkaon sulod sa payag niini sumala pa sa kapolisan.
Si PO2 Arnie Goc-ong, homicide investigator, mibutyag nga mga alas dose sa kaadlawon dihang adunay nabati ang mga residente nga upat ka masipang buto sa armas apan wala na niini tagda tungod sa kahadlok.
Giingong taud-taud nakadungog na usab ang mga silingan og siyagit o tingog sa biktima nga nagkanayon “inyo pa gyud kong tiwasan?” Niana nang pagkabuntag nga nakahibalo na ang mga silingan nga patay na si Lato ug gisulod na kini sa sako.
Matud ni Goc-ong, duha ngadto sa tulo ka mamumuno ang mipatay kang Lato. Upat ka slugs sa bala sa kalibre .38 ang nakita sa kapulisan diha sa crime scene. “Wa ni kontra possible naay nayawyawan nga sakit unya wa kahibalo nga naa ni problema sa pangutok,” matud ni Goc-ong. (/EIM) (BANAT NEWS)