CEBU, Philippines - Ang konseho sa dakbayan sa Talisay miawhag kang Mayor Socrates Fernandez nga mandoan sa Disaster Risk Reduction and Management Council (DRRMC) nga mopahigayon og survey sa mga lugar sa Talisay nga dahilianan og yuta ug kalit nga baha aron makagama dayon og mga aksiyon sa paglikay sa disgrasya nga posibleng makakalas sa kinabuhi.
Kini human maaprobahi sa milabay’ng sesyon sa konseho sa maong dakbayan ang resolusyon numero 2012-28-6 nga gipasar ni Bise Mayor Alan Bucao, ang chairman sa committee on Public Order, Safety, Traffic Management and Public Utilities kabahin sa maong awhag. Gawas niini gipasusi usab sa Bise Mayor ang mga ekipo nga gamiton kung dunay mahitabong emerhensiya sama sa katalagman nga mugna sa kinaiyahan.
Matud ni Bucao nga obligasyon sa estado ang pagpanalipod sa katungod sa katawhan sa ilang pagpakabuhi diin kinahanglang hatagan og pagtagad ang ilang mga panginahanglan aron sila dili mabiktima sa katalagman.
Gikabalak-an ni Bucao nga niining pag-uwan-uwan karon posibleng makamugna kini og mga baha ug pagdahili sa yuta nga makahatag og peligro sa kinabuhi sa katawhan ug sa mga kabtangan.
Tungod niini kinahanglang makahimo og lakang o mga plano ang kagamhanan samtang wala pay nahitabong disgrasya. (BANAT NEWS)