CEBU, Philippines - Mikabat sa 5 mil ka mga Community Investigative Support (CIS) volunteer sa nagkadaiyang rehiyon sa nasud ang midagsa sa Cebu International Convention Center atol sa ilang kasaulogan sa unang anibersaryo ug sa gipahigayong CIS Summit kagahapon.
Giorganisa sa Criminal Investigation and Detection Group (CIDG), si CIDG Chief Director Samuel Pagbilao Jr. miingon nga ang mga CIS dinhi sa Sugbo kabahin sa kaping 20 mil ka CIS sa tibuok nasud. Si Pagdilao mapasalamaton kaayo sa mga CIS Volunteer tungod sa kadako nga natabang niini sa mga kapolisan sa tibuok nasud kay mao man kini ang tiglawog kanila og impormasyon bahin sa kalihokan sa mga kriminal.
Gumikan niini gipasalig ni Pagbilao nga protektahan gayud sa CIDG ang mga CIS volunteer sa panahon nga may mohulga sa kinabuhi niini. Matud pa niya nga ang pagka-membro sa CIS volunteer dili masayon tungod kay aduna kini mga requirement sama sa barangay clearance ug police clearance, ug ipaubos usab sa background ug personality check ang usa ka tawo una kini mahimong membro.
Gawas niini, mopaubos usab sa training ang usa ka aplikante aron kini masayod sa mga gimbuhaton sa usa ka CIS Volunteer.
Matud pa ni Pagdilao, gawas sa pagbansay panid-an usab nila kini kun angay bang dawaton sa maong katungdanan.
Samtang gihulagway usab niya nga ang maong summit usa ka maayong higayon aron matuki nila ang mga mahinungdanong butang ilabi na ang bahin sa pagpaubos sa insurance sa kinabuhi sa matag membro niini. ( /WC) (BANATNEWS)