CEBU, Philippines - Wala pa gani makagawas gikan sa tambalanan si Ronald Aventurado, ang zookeeper nga napaakan og Philippine Cobra niadtong Martes, lain na usab ang napaakan gihapon og halas ug miadto dayon sa Cebu City Medical Center (CCMC) kagahapon aron magpatambal.
Hinuon, wala na kinahanglana pang mokuha og anti-venom nga tambal gikan sa Camiguin sanglit anti-tetanus lang ang gi-inject kang Jorge Arcayan, 51, nga taga Villa Leyson 2 Subdivision, Bacayan ning dakbayan. Ang halas may gitas-ong 24-pulgadas nga iyaha usab gitigbas ug gidala niya sa CCMC.
Si Dr. Ludwig Sandalo, kinsa maoy miatiman kang Arcayan gikatahong mipasalig kang Arcayan nga dili kini mala sanglit wala maglisod og ginhawa si Arcayan human usa ka oras human kini mapaaki.
“Nakulbaan pud ko uy, mao bitaw diri jud ko nidagan kay kahibalo man ko nga naa silay anti-venom diri,” matud pang Arcayan kinsa giturokan og anti-tetanus alas-5:45 sa hapon.
Si Arcayan sakop sa barangay Bacayan Lupong Tagapamayapa miingon nga nabantayan niya ang maong halas sa ilawom sa ilang lamesa maong mikuha siya dayon og duha ka kutsilyo ug gitigbas kini. Namatikdan na lang niyang nagkadugo ang usa sa iyang mga tudlo ug nagtuo siyang napaakan siya maong gidali niya kini og hikot og lastiko aron daw dili mokatap ang lala sa iyang lawas, apan pag-abot sa CCMC gipatangtang kini ni Sandalo kay nilagom na hinuon iyang tudlo.
Nagtuo si Arcayan nga ang maong halas gikan sa mga kakahoyan sa luyo sa subdivision. ( /EIM) (BANATNEWS)