CEBU, Philippines - Gisaway pag-ayo ni Mayor Michael Rama ang mga kaatbang niya sa politika gumikan sa giingong paggamit sa iyang hulagway nga wala’y pagtugot kaniya busa iyaha kini nga nga gi-warningan nga hunongon na kini.
Nasayran nga dunay tarpaulin nga gibitay gawas sa Barrio Luz Sports Complex sa miaging adlaw diin gipahigayon ang special session sa Konseho sa siyudad.
Ang tarpaulin gikatahong duna kini mga nawong nila ni Rama ug Governor Gwendolyn Garcia ug dunay suwat nga “Together nothing happened” nga nagsaway sa kooperasyon sa duha ka mga lider.
Giklaro hinuon ni Rama nga wala siya’y gipasanginlang tawo apan nakapaduda kaniya nga kini gibutang sa lugar nga gipahigayonan sa session sa konseho nga mayoriya sakop sa Bando Osmeña Pundok Kauswagan (BOPK).
“Kinsa man diay ang atong madudahan? Lain sad kaayo kung ako ang mobutang adto,” sumala pang Rama kinsa mihulagway niini nga “unprofessional” kaayo.
Giklaro hinuon sa mayor nga wala masulod sa iyang hunahuna nga mohimo og legal nga aksyon basta igo ra siya mi-warning sa iyang mga kontra sa paghunong na sa paggamit sa iyang hulagway.
“Unsa naman nang klase sa utok? Nganong mobuhat man sila ana?” dugang pa ni Rama.
Samtang ang usa sa mga konsehal nga sakop sa BOPK nga si Konsehal Alvin Dizon mipadayag nga dili siya makahatag og komento kalabot niini gumikan kay wala pud siya’y ideya kung kinsa ang nagpataud sa maong tarpaulin. - BANAT NEWS