CEBU, Philippines - Nanawagan ang kahugpongan sa mga nagpuyo sa Barangay Luz nga ipaimbestigar ang Community Mortgage Program (CMP) sa tulo ka mga sitio sa ilang dapit tungod kay nasudlan kini og professional squatters.
Ang Barangay Luz Urban Poor Fraternal Organization (BLUFPO) nga dunay 32 ka panimalay nga miyembro pinangulohan ni Generosa Corbeta nabalakang nasudlan na ang programa og mga professional squatters aron makabenipisyo gikan niini.
Matud pa sa grupo nga ang mga professional squatters mihimo nang negosyo sa programa sa gobiyerno.
Base sa nakuhang impormasyon sa BLUFP nagtug-an nga ang CMP Homeowners Association (HOA) sa Sitio Mabuhay, Nangka ug Lubi sa Barangay Luz may gitugotang mga indibidwal nga makaangkon og luna sa maong mga dapit pinaagi sa CMP.
Ang maong mga tawo giingong aduna na’y mga balay ug yuta sa ubang dapit apan buot gihapong makaangkon og luna sa ilang lugar samtang ang mga orihinal nga mga molupyo sukad pa dekada 50 nameligrong demolison.
Matud pa nga ang mga orihinal nga mga residente nga nagpuyo sa mga luna sukad pa sa 1950 nasayod nga ang mo-assume sa ilang mga luna, nanag-iya og mga balay sa Barangay Luz ug ubang lugar nga gawas sa maong barangay.
Nanawagan usab karon ang maong grupo nga matabangan sila gumikan kay dili motugot nga mapahawa sila sa ilang gipuy-an. - BANAT NEWS