CEBU, Philippines - Wala pay usa ka adlaw nga nagserbisyo isip usa ka katabang ang usa ka babaye nga gituohang kawatan diay misakiyo kini dayon sa dul-an P300 mil nga kantidad sa mga alahas sa iyang agalon diha sa dalan Lemon sa barangay Basak ning dakbayan.
Ang nabiktima mao si Genesis Gaston Dacua, 28, samtang giila ang katabang nga si Lily Luyas taga Bayawan, Negros Oriental kinsa giingong girekomendar sa silingan sa biktima.
Tungod kay rekomendado sa silingan wala’y pagduhaduhang gidawat kini sa banay’ng Dacua apan wala pa kini maabti og usa ka adlaw kalit kining miikyas dala ang diamond engagement ring sa biktima nga nagkantidad og P35 mil ug laing nagkadaiyang alahas nga nagkantidad usab og P250 mil.
Matud pa ni PO1 Ramil Duyag, sa Theft and Robbery Section (TRS) nga sa miaging bulan nakahimamat usab sila og susamang modus sa katabang nga ang tuyo mao gyud ang pagpangawat. Gipahimangnoan sa kapolisan ang publiko nga pilion og kutikutihon gyud ang mga aplikante nila nga buot motrabaho isip katabang sama sa pagtino sa ilang background una pa sila dawaton. - BANAT NEWS