CEBU, Philippines - Gumikan sa kahiubos nga dili siya pinangga sa iyang ginikanan naghikog ang usa ka ulitawo pinaagi sa pagbitay og pisi sa sanga sa mangga duol sa ilang balay sa sitio Pool, barangay Bankal, dakbayan sa Lapulapu sa miaging buntag,
Gahi na ang lawas sa namatay nga si Narlon Ceciban, 23, ulitawo dihang napalgan sa ilang silingan nga nagbitay sa mangga kansang liog gihiktan og pisi nga gigaid sa sanga sa mangga ang pikas tumoy.
Matud pa ni PO2 Winston Ybañez sa homicide section sa Lapulapu City Police Station nga nadawat nila ang maong alarma gikan kang Philip Libre, hingkod, nga silingan sa biktima kinsa miingon nga nakurat siya dihang maoy misugat sa iyang mga mata sa paggawas niya sa ilang balay ang lawas ni Ceciban nga nagbitay na.
Iya kining gisuwayan og hikap sa pagtuo nga bag-o pang naghikog, apan matud pa tuskig na ang lawas niini nga wala nay kinabuhi ug gituohan nga namatay kini sa miagi pang gabii. Midugang si PO2 Ybanez nga gitug-anan sila sa inahan ni Ceciban nga sa miaging buntag nabati nila ang pagmahay niini kay dili kuno siya pinangga nilang iyang ginikanan.
Maoy hinungdan nga milakaw kini ug wala na nila igkita hangtud pagka-gabii ug mao na lay nasuta nila nga nagbitay na ilang anak sa pagkabuntag. Gimandoan sila sa kapolisan nga ipaubos sa autopsy ang patay’ng lawas niini. (BANAT NEWS)