CEBU, Philippines - Nakabsan sa kinabuhi ang usa ka menor de edad human kini gipusil sa igsuon sa iyang gikulata pasado alas-12 sa tungang gabii kagahapon diha sa dalan Kawit, sitio Ermita Proper sa barangay Ermita syudad sa Sugbo.
Ang biktima nailhan nga si Sanden Bahay Sarmiento, 17, molupyo sa sitio Bato sa maong barangay samtang ang suspetsado nailhan sa ngalang Kim Cellan, 19, molupyo sa Ermita Proper nga padayon pang gipangita sa kapolisan. Sa pasiunang imbestigasyon sa kapolisan nasayran nga ang biktima uban sa mga higala luwan sa usa ka traysikad dihang gibabagan sa suspek ug gipusil si Sarmiento sa gidalang armas.
Ang biktima daling gidala sa Cebu City Medical Center tungod sa samad pinusilan nga naangkon niini sa isi’g ka kilid sa iyang lawas apan paglabay sa pipila ka minutos nakabsan kini sa kinabuhi sumala pa sa report sa Homicide Section sa Cebu City Police Office.
Base sa nakuhang impormasyon sa kapolisan dunay gikulata ang biktima sa maong dapit nga giingong igsuon sa suspek, mao kini karo’y gituohang motibo sa maong pagpamusil. - BANAT NEWS