CEBU, Philippines - Ang konseho sa siyudad sa Sugbo gikatakdang mopatawag sa mga kadagkoan sa National Telecommunications Commission (NTC) tungod sa mga reklamo sa mga cellphone users kabahin sa ‘expiry date’ nga gipatuman sa nagkadaiyang telecommunication companies (telco) sa mga prepaid loads.
Sumala pa sa nangamahan sa maong resolusyon nga si Konsehal Alvin Dizon lisod kaayong kitaon ang salapi busa makiangayon lang nga patas pud unta ang pagtratar sa mga telco ngadto sa ilang mga kostumer.
Matud pa ni Dizon nga subo kaayo nga palandongon nga mahanaw dayon ang load sa kunsumidor bisan wala nila kini gamita gumikan kay naabtan sa expiry date.
Nagkanayon ang konsehal nga ang resolusyon nga gipasar sa konseho tubag kini sa ubay-ubay na nga reklamo nga ilang nadunggan gikan sa mga tawo nga miisip nga gikuhaan sila og katungod sa gipalit nilang load.
Kahinumduman nga una nang giawhag sa Senado ang mga telco nga moduso og mga pagtoon kalabot sa maong reklamo sa publiko niini.
Samtang usa ka call center agent ang nahinabi sa Banat News nga si Wena Mae Diaz kinsa miangkong tiggamitan og cellphone matag karon ug unya nga duna gyuy panahon nga dili nila mahurot og gamit ang ilang load.
“Parehas nako, motawag ug mo-text ra gyud ko kung duna kuy importante nga kontakon. Nindot unta paminawon nga duna kay load nga imong magamit kung dunay emergency apan nakapait lang kay imposible lang kaayo na nga mahitabo, kay duna man guy expiry date ang load,” sumala pa ni Diaz.
Si Diaz isip cellphone user nahibulong nganong nagpakahilom ra ang NTC niini kung duna ba’y posibilidad nga wagtangon ang mga expiry dates sa mga prepaid load. - BANAT NEWS