CEBU, Philippines - Nadakpan sa kapolisan ang usa ka construction worker nga dugay nang wanted sa kasong pagpanglugos sa usa ka special child didto sa barangay Poblacion lungsod sa Boljoon, niadtong Huwebes. Ang suspek giila lang sa ngalan nga Jose, ulitawo, construction worker ug nagpuyo sa maong lugar.
Si Jose may kauban usab nga duha niya ka higala kinsa gitumbok nga responsabli sa pagpanglugos sa usa ka minor de edad nga may deperensiya sa panghuna- huna nga ilang silingan niadto pang tuig 2008.
Si PO2 Ariel Derama sa Boljoon Police Station mibutyag sa Banat News nga dugay na nga milayas ang suspek ngadto sa laing lugar human sa maong panghitabo kauban ang duha niya ka mga barkada nga wala na mopatin-aw sa ilang dapit.
Apan matud pa ni PO2 Derama nga sa miaging adlaw nakadawat sila ug inpormasyon nga ang suspek miuli na sa ilang balay hinungdan nga gisilbi dayon sa kapolisan ang arrest warrant nga misangpot sa pagkasikop diha-diha sa suspetsado.
Matud pa niya nga wala kini makaikyas kay didto kini sulod sa ilang balay nga mipahuway pag-abot sa kapolisan nga nagdala sa orden de aresto
Kagahapon gipresentar sa kapolisan ang suspek ngadto sa sala ni Argao RTC Branch 26 Judge Maximo Perez nga maoy nagluwat sa arrest warrant batok kaniya.
Ang kapolisan sa Boljoon padayon pang nangita sa duha ka kauban sa suspek nga may labot sa maong kaso. (/WC) - BANAT NEWS