CEBU, Philippines - Daw nabag-ohan ang mga polis ug ubang mga kawani sa Talisay City Police Station sa matag bagting sa “satisfaction bell” nga tuyong gibutang alang sa publiko nga patingugon kung sila matagbaw sa serbisyo sa kapolisan. Mabantayan niining bag-o lang diha duol sa pultahan sa TCPS atubangan gyud sa lamesa sa desk officer nagbitay ang usa ka kampana.
Si Superintendent Eddie Recamara, hepe sa TCPS mibutyag sa mga tigbalita nga ang maong kampana bagtingon sa mga tawong natagbaw sa serbisyo sa mga polis o uban pang mga personnel diha sa police station.
Pinaagi usab niini mahibaw-an sa mga polis kung nagkulang sila sa ilang serbisyo sa mga tawong midangop kanila ini unya og biya nila sa presinto kung dili kini patingugon sa mga tawo. Gibutyag sa hepe nga ang maong pagbutang og kampana proyekto kini sa Police Regional Office (PRO)-7 ug naabot na kini ngadto sa national level.
Ang PRO-7 dunay direktiba sa maong proyekto diin tanang police stations ang pabutangon gyud og kampana o satisfaction bell tulo ka bulan na ang nakalabay.
Gibutyag sa hepe nga matag dunay mopabagting sa kampana makurat gyud ang iyang mga sakop nga kaniadto dili nila mabati. Hinuon matag bagting bation og katagbawan ang mga polis nga sila nakaserbisyo ug nakatuman sa ilang kaakohan isip mga dangpanan sa katawhan. ( EIM) - BANAT NEWS