CEBU, Philippines - Usa ka Amerikano ug uyab niining Cebuana ang gidakop sa mga sakop sa Regional Anti-Human Trafficking Task Force human gireklamong mibugaw ug mibaligya sa lima niini ka mga anak nga babaye sa usa sa mga barangay dinhi sa siyudad sa Sugbu.
Tulo sa mga bata nga pulos menor ang naluwas sa mga awtoridad samtang gidakop ang 37-anyos nilang inahan nga miangkong nagbaligya usab sa iyang unod ug ang 47-anyos nga uyab niining Amerkano nga iyang gikatipon sulod na sa napulo ka tuig.
Sa pakighinabi sa Banat News ni PO3 Etelberto Timagus sa RAHTTF mibutyag nga nakadawat sila og tawag gikan sa usa ka opisyal sa barangay nga nagpahibalo kalabot sa usa ka 14-anyos nga dalagita buot kuhaon sa inahan ug sa usa ka langyaw atol nga tingklase.
Sumala pa nga ang bata pagkakita sa duha daling midagan ug mitago sa kasilyas maong nasuko og maayo ang duha maong mitawag sila sa barangay.
Nianang pagkagabii inabagan sa apohan ug sa 14-anyos giadto sa mga awtoridad ang inahan niini ug ang langyaw nga nag-inom diha sa dalan Pelaez sa barangay San Antonio ning dakbayan.
Kauban sa duha ang 15-anyos nga maguwang sa dalagita nga gi-table sa usa ka langyaw, tungod niini daling gidakop ang duha ug gisalbar ang 15-anyos ug ang babaye nilang manghod nga 4-anyos nga nagbahasbahas sa maong dalan.
Sumala pang Timagus, ang 14-anyos gisuwayan kaniadto og bugaw sa inahan apan milayas, midugang kini nga giabuso kini sa langyaw nga kapuyo sa inahan.
Ang iyang igsuon nga 15-anyos wala na lang moreklamo sa pagbugaw sa ilang inahan. Gisusi na usab sa kapolisan ang report nga duna pay laing duha ka anak nga babaye ang ginang nga giingong iyaha usab gibaligya didto sa Leyte.
Ang duha ka mga sinumbong kusganong mihimakak sa alegasyon sa mga bata dihang kini nakahinabi sa Banat News ug mipadayag nga aron lang mabuhi ang iyang mga anak iyahang gibaligya ang iyang dungog.
Ang tigpamaba sa International Justice Mission Andrey Sawchencko nga nahinabi sa Banat News nagdumili paghatag og komento sa operasyon apan mipadayag kini sa kalipay nga nasalbar ang mga biktima.
Ang mga bata gidala na sa Department of Social Welfare and Development samtang gisusi pa ang report kabahin sa laing duha ka mga igsuon sa mga bata nga atoa sa Leyte.
Sa laing bahin usa, gihapon ka gipasanginlang bugaw nga mga bayot ang gipangkasohan og Human trafficking human sila mibugaw og unom ka mga babaye diin ang uban niini mga minor pa niadtong Miyerkules sa gabii diha sa eskina Plaridel Street ug UN Avenue sa barangay Alang-alang sa dakbayan sa Mandaue.
Ang duha gikiha sa hiniusang pwersa sa Basak Police Station, Canduman Police Station, Women’s Desk sa Mandaue City Police Office human sila masikop sa operasyon.
Ang maong mga bayot nga pulos nagpangidaron og 22- anyos midala og unom ka mga babaye diha sa gasolinahan sa maong lugar subay sa ‘order’ sa police decoy nga nagpakaaron-ingnong kustomer.
Ang matag usa ka babaye giingong may presyo P1,000. Human mabayri og P6,000 daling nanakay og taksi ang duha ug mibiya ug gibilin ang unom ka mga babaye, apan sa unahan gidakop sila sa mga polis.
Ang mga babaye gidala sa City Social Welfare Services samtang gihikay ang kasong paglapas sa Anti-Human Trafficking in Person batok sa duha. (/EIM) - BANAT NEWS