CEBU, Philippines - Usa ka butanding ang nasulod sa bungsod sa usa ka mananagat sa Toledo City niadtong Lunes sa gabii.
Ang maong butanding nga adunay gibug-aton nga 800 kilos ug gitas-on nga 20 ka tiil ang napalgan ni Eddie Bubuli, 71, molupyo sa Looc 2 barangay Bato syudad sa Toledo.
Sa pakighinabi sa Banat News ni PO1 Joey Alqueza, sa Toledo Police gisuwayan pagpagawas ni Bubuli ang maong isda apan naglisod kini maong nagpakitabang siya niini sa mga kaubang mananagat.
Niadto nang Martes sa gabii nila hingpit nga napagawas sa bungsod ang maong isda ug giabog kini hangtud sa lawom nga bahin sa dagat.
Ang regional director sa Bureau of Fisheries and Aquatic Resources (BFAR-7) Andres Bojos mibutyag usab sa dihang nahinabi sa Banat News nga posibleng aduna pay daghang butanding nga anaa sa kadagatan sa syudad sa Toledo. Matud pa ni Bojos nga ang mga butanding migratory nga matang sa isda o kadtong lagyo og langoyan aron sunodsunoron kung asay abundang pagkaon ug hustong temperature sa dapit. Ang pagkaon sa butanding mga ‘krill’ o uyap.
Samtang gibutyag usab ni Bojos nga sayod na ang katawhan nga gidili ang paghikap sa mga butanding base sa balaod, apan sa video footage sa TV Patrol Central Visayas kagahapon daghan gihapong mga tawo ang walay pagpakabana sa mga butanding ug nagpa-picture pa. - Lesley Caminade-Vestil/EIM (BANAT NEWS)