CEBU, Philippines - Gipahimangnoan sa Philippine Atmospheric Geophysical and Astronomical Services Administration (PAGASA) Mactan ang mga lokal nga opisyal sa Sugbo nga mangandam og lakang aron maluwas ang mga Sugboanon gikan sa baha sama sa nasinati sa Luzon ug sa Metro Manila gumikan sa uwan nga dala sa hangin nga habagat.
Kini ang gibutyag ni Rafael Tapales sa Pagasa Mactan sa pakighinabi sa Banat News kagahapon.
Matud pa niya nga usa sa nakahagit sa pagbundak sa kusog nga uwan didto sa Luzon ug Metro Manila mao ang gibiling hangin sa bagyong Gener nga misuyop sa panganod nga nagdala og bagang uwan ug gibundak didto sa maong mga lugar.
Dugang pa niya nga mibiya na sa nasud ang maong bagyo apan nagbilin kini og kusog nga ulan nga gisugnoran sa hangin nga habagat nga maoy nakaingon sa grabeng baha didto sa kaulohan. Si Tapales miingon nga ang dili maayong pagka-atiman sa mga kanal sa maong lugar ug ang pagpataka og tukod og mga edipisyo o mga balay maoy usa sa hinungdan sa pagbaha.
Kini tungod kay wala nay kaagian ang tubig nga buot molusad paingon sa dagat.
Gitataw ni Tapales nga kini maoy labing mahinungdanon nga kahimoan og lakang sa mga lokal opisyal dinhi sa Sugbo.
Matud niya nga bisan wala pa makasinati ang Sugbo og sama sa nahitabo sa Metro Manila ug sa nagkalainlaing dapit sa Luzon mas maayong karon pang daan mapangandaman na samtang dili pa ulahi ang tanan.
Hinuon gihawanan na sa kagamhanan ning dakbayan ang mga tampi sa kasapaan sa mga balay nga gipanarok niini nga maoy usa sa sulosyon sa mga problema nga may labot sa baha.
Ang pagpanghawan sa mga kanal maoy labing siguruon karon aron nga hapsay ang dagan sa tubig sa uwan ug kalikayan ang pagbara ug pagbaha ning siyudad sa panahon sa ting-uwan matud pa ni Tapales. (BANAT NEWS)