CEBU, Philippines - Makadawat og P25 mil ngadto sa P30,000 ang matag usa sa 1,500 ka mga kawani sa Kapitolyo isip ilang bonus sa pagsaulog sa ika-443 nga founding anniversary sa lalawigan sa Sugbo. Kini mas ubos apan mas taas usab alang sa ubang mga kawani sa Kapitolyo kung itandi sa niaging tuig nga ilang nadawat.
Gipahibawo kagahapon ni Gob. Gwendolyn Garcia nga matag opisyal ug kawani sa Kapitolyo makadawat og P15 mil isip Collective Negotiation Agreement (CNA) incentive.
Lahi sa miaging tuig, ang labing maayo og performance nga buhatan karong tuiga wala na hatagi og dugang pahalipay apan ang matag kawani makadawat og dugang P10 mil kung may satisfactory rating sila ug P15 mil kung very satisfactory rating ang ilang performance.
Usa ka komitiba ang nagsusi karon sa performance sa matag kawani.
Palisiya na ubos sa administrasyon ni Garcia ang dili paghatag og pareho nga pahalipay apan ibase kini sa performance sa matag empleyado.
Sa miaging tuig, ang Kapitolyo mihatag og labing ubos P12 mil ug labing taas P35 mil isip anniversary bonus.
Kini gumikan kay ang matag empleyado sa top one department nakadawat man og dugang P15 mil, P12 mil sa ikaduha, P10 mil sa ikatulo, P8 mil sa ikaupat ug P7 mil sa ikalima samtang ang wala malakip sa top 5 nakadawat gihapon base sa fair rating.
Gipasabot ni Garcia nga adunay bag-ong kamandoan ang Department of Budget and Management nga ang savings ubos sa personal services (PS) dili na mahimong gamiton isip bonus gawas sa maintenance and other operating expenses (MOOE).
Bisan pa niini, hayag ang panagway sa mga kawani sa Kapitolyo human sa pahibawo ni Garcia ug ang paabuton mao nalang ang pag-aprobar sa hunta probinsiyal sa supplemental budget nga iduso ni Garcia karong semanaha. (BANAT NEWS)