CEBU, Philippines - Mag-atubang og daghang kaso lakip na ang kasong pagpanglugos sa iyang kaugalingong anak ang usa ka mag-uuma nga nadakpan sa kasong treasure hunting didto sa hurisdiksyon sa Philippine Tourism Authority sa barangay Casay, lungsod sa Dalaguete sa miaging hapon .
Ang suspetsado mao si Cecilio Baranggan, hingkod, minyo ug usa ka mag-uuma nga nagpuyo sa barangay Caleriohan, lungsod sa Dalaguete kauban ang laing upat pa ka treasure hunter.
Si SPO2 Cleto Pia, imbistigador sa Dalaguete Police Station mibutyag sa Banat News nga usa sa mga anak niini kansang tinuod nga ngalan gitago , maoy giingong nakig-alayon sa kapolisan ug maoy misumbong nga giunay siya sa paglugos niining suspetsado nga iyang amahan.
Ang maong dalaga giingong mibutyag sa kapolisan nga may pugakhang ang suspetsado nga gihiposan sa ilang balay nga maoy gamiton niini sa paghadlok kaniya ug sa ilang pamilya aron dili motug-an sa mga otoridad. Matud ni SPO2 Pia nga giubanan sila sa mao mismong dalaga ngadto sa ilang balay diin nakuha nila ang pugakhang nga adunay bala sa shotgun.
Ang biktima nakig-alayon kanila tungod kay desidido na kuno kini nga mopasaka og kasong pagpanglugos batok sa iyang amahan.
Midugang si SPO2 Pia sa milabay’ng tuig nakapa kurasyon na ang biktima bahin sa maong kaso apan wala makapasaka og kiha tungod sa kahadlok sa bahad sa suspetsado.
Sumala ni SPO2 Pia nga ila nang gihikay ang kasong kalapasan sa National Cultural Heritage Act of 2009 kon R.A. 10060 nga maoy ipasaka batok sa suspek. Nasakpan sa akto ang suspetsado uban sa upat ka tawong kauban niini nga nangawot og treasure sa dapit nga gidili sa balaod.
Gawas niini laing kasong illegal possession of firearms ang ipasaka usab batok sa nahisgutang suspetsado, matud pa ni SPO2 Pia. (BANAT NEWS)