CEBU, Philippines - Gibutyag ni Kapitan Michael Gacasan sa barangay Guadalupe nga dili siya modawat sa service vehicle nga gitagana alang kaniya gikan sa city hall.
Apan iyang giklaro nga ang labing gikinahanglan sa iyang barangay mao ang garbage truck alang sa mga basura sa barangay.
Sumala pa ni Gacasan nga nagpunay siya og follow-up sa City Hall sa gi-request nila nga garbage truck apan nagkalain-lain lang nga rason ang iyang nadawat.
Nagduda si Gacasan nga usa lang kini ka pamolitika sanglit nasayud man si Mayor Michael Rama nga loyal siya nga supporter sa Bando Osmeña Pundok Kauswagan nga gipangulohan sa karibal ni Rama sa politika nga si Kongresista Tomas Osmeña.
“Pamolitika gyud na, Type O man gud ko,” suma pa ni Gacasan.
Gitataw ni Gacasan nga wala siya magkinahanglan nianang gitanyag nga sakyanan alang kaniya gikan sa City Hall kay mas importante ang garbage truck alang kaniya.
Midugang si Gacasan nga sa pagkakaron unom ra ka trak sa basura ang nagdagan sa iyang barangay nga maoy tighakot sa mga basura sa katawhan.
Gumikan sa kakuwang niini dili malikayan nga malangay ang pagkuha sa basura sa ubang suok sa barangay. – (BANAT NEWS)