CEBU, Philippines - Gidakop ug gibilanggo ang usa ka sakop sa kabomberohan nga nadestino sa lungsod sa Barili human pasanginling nanghagis diha sa presinto tungod kay gustong pabuhian ang babayeng minyo nga gipuyopuyo niini nga gipapriso sa bana tungod sa pakigrelasyon niini ngadto sa maong bombero.
Alas 9:00 sa gabii niadtong Huwebes gidakop ang 47-anyos nga bomberong may ranggong Fire Officer Two (FO2) nga taga siyudad sa Lapulapu human gikatahong misukmag sa hepe sa mga polis nga si Chief Insp. Marlon Gumabao.
Ang bombero gikatahong nasuko sa mga polis nga gipriso ang 28-anyos nga ‘kabit’ nga taga siyudad sa Carcar kinsa gipadakop sa mismong bana niini human masakping nagpuyo ang duha. Matud ni SPO3 Elmer Opsima sa Barili Police Station dihang nahinabi sa Banat News, isog kaayong miabot sa ilang buhatan nianang gabhiona ang bombero ug gikwestyon nganong gidakop ang maong babaye.
Tungod niini, miduol si Gumabao ug gitambagan ang bombero apan gikatahong nasuko hinuon kini ug gisukmag ang hepe hinungdan nga mitabang og ulang ang ubang mga polis.
Usa sa mga polis nga mitabang pagpugong sa bombero mao si PO2 Marcelino Quivedo apan gikatahong gipaak siya sa maong bombero diha sa bukton, tungod sa pagmagahi gipasulod sa karsel ang maong bombero.
Sumala pa ni Opsima ang babayeng giingong kabit sa bombero gibalhog sa karsel niadtong Miyerkules sa alas 9:05 sa gabii human kini masakpi sa bana niini nga migakos ug nakighawok sa maong bombero sulod sa buhatan niini. Dugang pa ni Opsima nahibulong ang bana sa babaye nganong dili na kini mag-ulian sa ilaha ug nakadungog kini og estorya nga mitipon na kini sa maong bombero diha sa Barili.
Tungod niini giadto sa bana ang buhatan sa maong bombero ug diha giingong naaktuhan niini ang gibuhat sa duha hinungdan nga gipadakop niini ang asawa apan nakaeskapo ang bombero.
Matud ni Opsima kasong direct assault and serious disobedience and resistance ang ipasaka batok sa bombero samtang gipaabot pa ang pagpasaka og kasong adultery sa bana ngadto sa asawa niini. (/EIM) - BANAT NEWS