CEBU, Philippines - Ang 400 ka mga kawani sa Kapitolyo mipahimus sa health and wellness program nunot sa kasaulogan sa ika-443 nga anibersaryo sa lalawigan sa Sugbo.
Samtang lima ka mga batakang serbisyo sa panglawas ang gitanyag niining tuiga nga naglangkob sa medical consultation; complete laboratory examination sama sa Random Blood Sugar; Cholesterol; Urinalysis; ug Blood Typing, EKG Examination; Bone Density Determination ug ang bag-ong nadugang mao ang Traditional/Alternative Medicine.
Matag tuig usab gipahigayon ang blood letting diin ang mga empleyado sa Kapitolyo ug sa ubang mga buhatan sa goberno mo-donate sa ilang dugo ngadto sa Regional Blood Center(RBC) sa DOH-7.
Gibutyag usab ni Dr. Christine Reynette Ligaray, Chief RBC -7 nga sa ila usab nga kampanya bahin sa pag- donate og dugo, gisuportahan usab ni Governor Gwendolyn Garcia.
Matag tuig ang Kapitolyo maka-donate og mga 30 ngadto sa 50 ka mga bag nga dugo .
Bisan ang publiko giawhag usab sa kagamhanan sa lalawigan nga mohatag sa ilang dugo .
Ang Traditional/Alternative medicine gitanyag usab sa IPHO pinaagi sa Pyro Energen Machine, ug Rife Machine ,usa ka teknolohiyang Haponanon nga gigamit niini aron makatabang sa mga tawo nga may gipamati nga balatian sa lawas.
Gipasundayag usab niini ang pinulbos nga uling sa bagol nga makatabang usab sa mga nagkalain-laing balatian nga gibatyag sa usa ka tawo.
Kining maong mga kalihukan maoy naghatag og dugang bulok sa ika-443 nga kasaulogan sa lalawigan. - BANAT NEWS