CEBU, Philippines - Gipatabang na sa pagdumala sa Cebu City Women's and Family Affairs Commission (CCWFAC) ang kanhi kapitan sa barangay Lahug ug karon konsehal sa maong barangay nga si Mary Ann delos Santos.
Gitataw ni delos Santos nga wala siya’y partikular nga pangalan sa iyang posisyon sa nahisgutang komisyon sa City Hall basta ang iyaha lang nga mopaambit siya sa iyang kaalam ug iyang katakos sa pagpa-ugmad sa mga adbokasiya sa kababayen-an.
Giklaro usab niya nga dili siya modawat og honorarium o sweldo sa City Hall kay boluntaryo ang iyang serbisyo sa dakbayan. Si delos Santos kanhi higpit nga kaatbang sa kaniadto partido ni Mayor Michael Rama diha sa North District.
Giangkon ni delos Santos nga si Mayor Michael Rama maoy mihangyo kaniya nga mopaambit sa iyang kaalam ug motabang sa pagpadagan sa CCWFAC.
“Nagpasalamat ko kang Mayor Rama nga nisalig siya sa akong kapasidad sa pag-pangalagad sa mga kababayen-an. Dili lang kay sa kababayen-an, mo-coordinate pud mi sa ubang sektor sama sa PWD (persons with disabilities) senior citizen ug uban pa,” sumala pa ni de los Santos.
Si delos Santos maoy usa sa mokandidato pagkakonsehal sa Team Rama sa umaabot nga piniliay sunod tuig apan iyang giklaro nga wala’y kolor pamolitika ang iyang pagtabang sa City Hall.
Matud pa niya nga usa ka maayong oportunidad ang gitanyag ni Rama nga makapangalagad sa katawhan hinungdan nga wala siya mag-duha duha sa pagdawat niini. ( EIM) - BANAT NEWS