CEBU, Philippines - Menor de edad nga gidudahang mangawat gibuboan og muriatic acid sa tag-iya sa usa ka panimalay sa dalan A. Lopez sa barangay Labangon, dakbayan sa Sugbo pasado alas-10 sa miaging gabii.
Ang 17-anyos nga batang lalaki nameligrong mabuta ug maguba ang dagway tungod sa aksido nga nasulod sa iyang mga mata gikatahong nayab-an og aksido ni Jessie Yu molupyo sa maong lugar sumala pa sa kapolisan. Sa pakighinabi sa Banat News ni SPO2 Crecente Dacillo sa Punta Princesa Police Station, misaysay kini nga midangop sa ilang buhatan ang amahan sa bata aron magpatabang sa nahitabo sa iyang anak. Sa nakuhang inisyal nga impormasyon sa kapolisan, nasayran nga ang biktima diha sa silong sa balay ni Yu, wala matino sa kapolisan kung unsay gibuhat sa bata sa silong. Dihang nasuta sa suspetsado nga adunay tawong naghupohupo sa ilawom sa iyang balay gibubuan niya kini og muriatic acid ug napunta sa nawong sa bata nga nakapahilos sa panit niini. Matud pa ni Dacillo nga nagkaatubang na ang pamilya sa bata ug si Yu ug giingong naareglo na kini human mipasalig ang naulahi nga gastohan ang pagpatambal sa biktima. ( /EIM) - BANAT NEWS