CEBU, Philippines - Upat ka polis sa lungsod sa Sogod ang gireklamong nangulata sa ilang dinakpan ug mipakiskis sa tanang buhok lakip sa pribadong bahin sa iyang lawas niadtong petsa 28 sa Hulyo samtang kini gitanggong sa mga polis.
Usa ka Gaudelio Montecalbo, 60, taga barangay Tabunok sa nahisgutang lungsod ang mireklamo ngadto sa National Police Commission-7 batok sa duha ka police officer 2 (PO2) ug duha ka police officer one (PO1) tungod sa gihulagway niyang dili tawhanong gibuhat ngadto sa iyang anak nga si Danny.
Sumala pa ni Montecalbo nahubog ang iyang anak nianang adlawa ug nagmaoy maong mitawag siya og polis, apan mikalma kini dayon sa wala pa maabot ang mga polis.
Dihang nangabot na ang gireklamong mga polis gihangyo sila ni Montecalbo nga dili na lang dad-on ang anak kay mipatuo naman kini apan gikatahong nangasuko ang mga polis ug ilaha gyud kining dad-on kay nahasol sila sa pagresponde.
Si Danny mibutyag sa Banat News nga dihang nakit-an siya sa mga polis gitionan siya og pusil sa tulo ug gibalikas dayon gipatidpatiran siya hangtud na sa pagsakay niya sa patrolcar.
Dugang reklamo ni Danny nga pag-abot sa karsel usa ka piniriso nga giilang Alkris Hudaya ang gikatahong mikulata kaniya tungod sa pag-ingon sa mga polis nga “kamo nay bahala ana kay gibun-og ang amahan ana.”
Sumala pa ni Danny nakaihi siya sa pagsukmag kaniya ug gikataw-an lang siya sa mga polis.
Nianang pagkagabii si Danny mipasangil nga nag-inom ang maong mga polis ug apil sa gipatagay ang mga kauban niyang piniriso ug nahadlok siya dihang nangayo og blade si Hudaya sa mga polis kay ‘kiskisan’ siya.
Matud pang Danny dunay polis nga mitubag nga “wala lagi blade, manihoa lang ninyo diha.” Nianang pagkakaadlawon na gipugngan siya sa mga priso ug diha gisugdan siya og kiskis ni Hudaya.
“Ila ‘kong gikiskisan sa ulo, sa akong ilok ug sa buhok nga diha sa akong kinataw ilang giapil og kiskis,” saysay pa ni Danny sa Banat News sa telepono.
Matud pa niya nga gibugalbugalan siya sa mga polis human niini hinungdan sa grabe niya kaulaw dihang gipapauli siya pagkabuntag.
Ang hepe sa kapolisan sa Sogod Police Station Sr. Insp. Aldrin Villacampa mikompirmar sa Banat News nga gireklamo ang maong mga polis sa manag-amahan apan mihimakak sila sa pasangil. Gimandoan ni Villacampa ang upat ka polis nga paesplikahon ug dunay himuong imbestigasyon batok kanila. (EIM) - BANAT NEWS