CEBU, Philippines - Kapin 600 ka mga call center agents sa call center company nga Direct Access Corporation nga nagbase sa IT Park sa Barangay Apas, ning dakbayan sa Sugbo ang nawagtangan og trabaho human kalit nga nanirado ang ilang kompanya niadtong Lunes sa gabii.
Apan nahibulong ang mga trabahante tungod kay wala sila hatagi og sayong pahibalo kabahin sa pagpanirado sa maong kompanya hinungdan nga daghan kanila nga mi-duty pa nianang orasa apan wala na pasudla sa mga gwardiya.
Sa notisya nga giluwatan sa DAC chief operating officer nga si Jeffrey Newman kini mipahibalo nga sirad-an ang maong kompanya sugod Hulyo 30,2012 kutob unom ka bulan tungod sa pagkaalkanse apan pahibaw-on ang mga trabahante sa subling pagbalik unya niini.
"If the company could not recover financially, there will be a permanent retrenchment on the sixth month where you will be paid what is due under the Philippine labor laws. Thank you for your continued understanding of the company's situation," sumala pa sa kopya sa notisya nga nakuha sa Banat News.
Ang maong mga call center agents midangop kagahapon sa buhatan ni Mayor Michael Rama aron magpatabang magiyahan sa angay nilang buhaton. Mireklamo silang sugod Hulyo 16 wala na sila makadawat pa og sweldo.
Ang chief of staff ni Rama nga si Philip Zafra maoy miatubang sa mga trabahante ug mipasalig kini nga motabang sa pagpadangat sa ilang reklamo ngadto sa Department of Labor and Employment. Mihimo na og endorsement si Rama sa reklamo sa mga trabahante ug ipadangat na kini sa DOLE. Ang mga call center agents giyahan sa City Legal Office.
Usa sa tambag ni Zafra mao nga iabot alang sa usa ka diyalogo ang mga trabahante ug ang mga tagdumala sa maong call center company aron mahatagan sila og katin-awan.
Matud pa ni Zafra nga moabot ngadto sa 650 ka mga trabahante ang nawad-an og trabaho. Ang Business Processing and Outsourcing (BPO) nga sama sa mga call centers dili pa lang dugay maoy giisip nga ‘booming’ nga negosyo sa nasud ug nalupigan pa niini ang gidaghanon sa mga call center agents sa kaniadto sikat sa BPO nga nasud sa India. (BANAT NEWS)