CEBU, Philippines - Wala nay kinabuhi dihang milutaw sa dagat human sa kapin duha ka adlaw nga pagka-missing ang usa ka giingong expert skydiver nga mi-parachute gikan sa usa ka eroplano niadtong Sabado apan mitugpa sa kadagatan sa South Road Properties sa Cebu City.
Si Ronald “Ronron” Mendez, 30, lumad nga taga Tagbilaran City, Bohol ug tinun-an sa AviaTour Flight School sa barangay Mactan syudad sa Lapu-lapu patay na dihang nakuha sa mga sakop sa Bantay Dagat sa Cebu City.
Ang patay’ng lawas ni Mendez nakit-an sa sakop sa Bantay Dagat nga si Juanito Escabas nga uban sa grupong padayong nangita kang Mendez sukad pa niadtong Sabado bisan sa kadautan sa panahon.
Matud pa ni Escabas ang patay’ng lawas diha na sa pier area sa barangay Pasil nakit-an nga nagkulob nga naglutaw sa dagat. Wala hinuon dayon magtoo si Escabas kun si Mendez ba kini, diha lang kini mailhi pagkakita sa asawa sa namatay nga si Hazel ug mga kaubanan ni Mendez.
Ang asawa ni Mendez nga si Hazel nga sa sayo pa kagahapon nagpa-interbyu ug malaumong buhi pa ang bana nagdumili na sa pakighinabi sa mga tigbalita dihang nakit-an na ang patay’ng lawas.
Ang patay’ng lawas ni Mendez nagsuot pa sa iyang puting t-shirt ug shorts, nagsapatos ug nagsuot sa iyang goggle.
Matod pa ni Cebu city Police Office, Homicide Section PO3 Lou Pagara nga niadtong Sabado sa buntag nag-parachute si Mendez ug upat ka mga kauban gikan sa usa ka Cesna plane diha sa ibabaw sa SRP.
Base sa impormasyong nadawat ni Pagara 8,000 feet gyud unta ang gihabugon mapabukhad na ang parachute sa usa ka skydiver apan gikatahong nag-free fall kini ug sa 6,000 ngadto sa 4,000 feet na mibukhad ang parachute ni Mendez.
Nakadugang sa peligro ang kusog nga huros sa hangin nga midala sa grupo ni Mendez padulong sa dagat apan ang duha milampos sa pagtugpa sa SRP apan sila si Mendez ug kaubang si Federico Albisete didto sa tubig mitugpa.
Si Albisete daling naluwas sa mga mananagat nga diha sa duol nianang tungora apan si Mendez gikatahong didto sa dapit nga walay nanagat nahagsa.
Sumala pang Pagara dunay migawas nga report nga duna nay miluwas kang Mendez nga usa ka lantsa maong wala na ipadayon ang gihimong search operation nianang adlaw sa pagtuong mouli ra si Mendez.
Apan naabtan na lang og duha ka adlaw wala pa kini mabalik hinungdan sa kabalaka sa pamilya niini. (/EIM) (BANAT NEWS)