CEBU, Philippines - Nakadawat na ang kagamhanan sa lalawigan sa Sugbo og P600 mil nga abang gikan sa Filinvest Land Inc. sa luna nga gitarokan niini sa iyang Business Process Outsources (BPO) Complex sa Salinas Drive Extention sa barangay Lahug, siyudad sa Sugbo nga gipanag-iya sa lalawigan.
Sumala ni Ma. Junelene Areneas, OIC Asst. Provincial Treasurer sa lalawigan sa Sugbo nga nahinabi sa mga sakop sa media nga ang maong kantidad maoy abang sa bulan sa Hulyo ug maoy labing unang abang sa Filinvest ngadto sa lalawigan.
Gipasabot ni Arenas nga may kakulian lamang og gamay sa maong abang tungod kay gipatibhangan man kini og withholding tax.
Alang kang Arenas nga di man tingale unta angayan pang kuhaan og withholding tax ang maong bayad kay goberno man ang gibayaran niini.
Samtang gipadayag ni Governor Gwendolyn Garcia sa mga sakop sa media nga mas motaas pa unya ang makolekta sa kagamhanan sa probinsiya kun mahuman na ang maong proyekto ug magsugod na sa pag-operate.
Kini tungod kay base sa gipirmahang kasabotan tali sa lalawigan ug sa Filinvest ang probinsiya sa Sugbo may bahin man gikan sa kita sa operasyon sa nahisgutang BPO complex. (BANAT NEWS)