CEBU, Philippines - Pagkahapsay na sa merkado sa siyudad sa Toledo sa dihang mihapit kami sa among biyahe padulong nga mipauli sa lungsod sa Tuburan. Salamin kini sa maayong pagpadagan sa pamunuan nila ni Mayor Rudy Espinosa ug Vice-Mayor Daydee Espinosa-Zambo. Kaniadto sumala pa sa mga vendors nga gubot ang sitwasyon sa ilang merkado. Hasol sa mga pumapalit kay lapok, hugaw ug gubot kay walay tukmang sectioning. Pasa-pasa bisan kinsa nalay mogamit o muokopar sa mga stalls. Apan karon hapnig na kaayo human gi-renovate ang tibuok merkado sa 2004. Hapsay na ug limpyo kay gipatuman na ang proper sectioning. Dagko’g halin ang mga vendors kay duol ra sa Ferry terminal ug Roro port nga dunay magbiyahian paingon sa San Carlos, Negros Occ.
* * *
Si Toledo City Administrator Jun Zambo maoy nagsugyot ug nangulo sa pagpahapsay sa Unity Park sa maong dakbayan. Ang barbekyohan kaniadto nagkatag sa daplin sa karsada nga hugaw kay walay hugasanan ug anha ra ihuwad sa kadaplinan. Apan karon hapsay ug limpyo na kaayo nga nagalinya kilid sa simbahan. Maoy hugopan sa daghang mangaon sa kinaham nga barbecue ug sinugbang isda nga ituslob sa lamiang sawsawan. Lahi sab didto sa Danao City kay ang mangaon sa tinap-anan naa gyoy paris sa kinaham nga atsal.
* * *
Samtang gipangga sa administrasyon sa Toledo ang mga vendors, gitagad usab ang mga senior citizens. Tapokon sila panahon sa pasko alang sa ilang regalo. Dunay Medical/Dental Mission alang kanila. Duna say burial assistance nga P2,000. Lain sab ang hugna sa Medical/Dental Mission sa kabarangayan lakip na sa libreng tambal ubos sa ilang “Duaw Alagad Program”. Ang kagamhanan sa siyudad gialsa sa tugkaran sa 38 ka mga barangay lakip na ang pagpaayo sa nangaguba nga kadalanan. Sanag ang kagabhion gumikan sa kutay sa streetlighting.
* * *
Sa edukasyon sa Toledo gihingusgan ang pagpatuman sa dugang mga classrooms. Gipunting nga makompleto ang 73 ka mga lawak-saringan ubos sa “Mission 73” ni Mayor Espinosa pahaom sa mag-73 anyos nga mayor sa 2013. Ang Toledo City adunay 63 ka mga eskuylahan diin 50 ang elementary ug 13 ang high school. Gidugangan sa siyudad og 25 ka mga magtutudlo agig abag sa gidistino sa Dept. of Education. Kompleto sa mga textbooks ug nagplano sa pag-apod-apod og mga school supplies dugang sa gipanghatag sa Kapitolyo. Aduna nay TESDA sa Ilihan, Toledo nga nagatanyag og mga vocational courses. Samtang 20 ka scholars sa kolehiyo ang gigastohan og 150 ka mga scholars ubos sa Social Reform Agenda Scholarship Program alang sa kabos nga kabataan.
* * *
Samtang gipalambo ang mga merkado sa Toledo, DAS Lutopan ug sa Matab-ang public market nagbuntaog na usab ang Metro Gaisano ug Gaisano Grand Mall. Daghang miabli og mga negosyo gumikan sa maayong administrasyon nga mohaom sa investment climate ilabina sa pagbalik sa operasyon sa Atlas Mining ug ang presensya sa Daang Lungsod Toledo Power Plant ug sa dili madugay tukoron ang Aboitiz Power sa Looc, Bato, Toledo. Daghang nakatrabaho gumikan sa pagturok sa mga dagkong edipisyo sa negosyo. Sa pag-uswag sa Toledo wala masayang ang pagtukod sa matahom nga 100-room hotel nga presentabling puy-an sa mga turista. Timaan kini sa dili kapugngan nga dagayday sa kalamboan sa Toledo. Dugangan unya sa pagpalambo sa Malubog Lake nga nagsabak og tab-ang nga tubig nga magsilbing prime tourist destination.
(tmj_aniscal@yahoo.com./0906-648-9637) (BANAT NEWS)