CEBU, Philippines - Patay ang usa ka 33- anyos nga ginang nga mamasurahay human kini maatrasi ug naligsan sa garbage compactor truck sa lungsod sa San Fernando nga nagyabo og mga basura sa dumpsite area sa sitio Pedrigosa sa barangay North Poblacion sakop sa maong lungsod alas 11:00 sa buntag niadtong Huwebes.
Ang biktima nga patay nang nadangat sa tambalanan mao si Maryjane Torecampo,33, nagpuyo sa maong lugar ug pagpamasura ang trabaho.
Samtang ang garbage truck dunay plaka nga GMY-215 nga nakaligis niya gipanag-iya sa kagamhanan sa San Fernando nga gimaneho ni Rogelio Cabrera, 58, taga barangay San Isidro ug drayber sa lungsod.
Matud ni SPO2 Victor Cuyno sa San Fernando Police Station dihang nahinabi sa Banat News namunit og mga basura ang biktima aron mabaligya ug nagpaabot sa pagyabo sa maong trak sa mga kargang basura nianang tungora.
Apan samtang nag-atras ang maong trak wala mabantayi ang biktima diha sa luyo ug kini naatrasan ug pagkatumba naligsan kini.
Human mahibaw-ing naligsan kini dali kining gikuha sa mga tawo ug gidala sa Vicente Sotto Memorial Medical Center apan gideklarar kini nga patay na ni Dr. Jonathan Navarro.
Si Cabrera mitahan sa iyang kaugalingon ngadto sa kapolisan apan kagahapon sa udto nakagawas kini human nakig-areglo ang kabanay sa biktima dungan sa pasalig nga abagahon niini ang tanang gastuhan. (BANAT NEWS)