24 ka Boy Scouts sa PHL namatay
CEBU, Philippines - 1963—Usa ka pait nga kabahin sa kasaysayan sa Boy Scouts of the Philippines ang gihinumdoman karong adlawa tungod sa kamatayon sa 24 ka mga Boy Scouts ug Senior Scouts sa usa ka plane crash sa Bay of Bombay sa nasud sa Indian diha sa Arabian Sea samtang sila padulong unta sa nasud sa Marathon, Greece aron morepresentar sa Pilipinas sa 11th World Jamboree. Niadtong Hulyo 25, 1963 ang delegasyon mibisita pa sa Malacañang ug giatubang ni Presidente Diosdado Macapagal ug napatik sa mga pamantalaan ang hulagway sa usa ka malipayong delegasyon. Sa 24 ka mga scouts ang mga lawas lang nila ni Jose Delgado, Henry Chuatoco, Roberto Castor, Ascario Tuason, Jr., ug Librado Fernandez ang positibong nailhan gikan sa mga patay’ng lawas nga napadpad sa baybayon sa India.
“Wear Yellow and Die”
1986—Tungatunga sa kagubot ug pag-alsa sa mga Filipino batok sa rehimeng Marcos milugwa sa kadalanan ang unang isyu sa The Philippine Star nga mao karoy nag-unang English daily newspaper sa nasud. Ang unang ‘banner’ story nga nahimong makasaysayanon gititulohan og “Wear Yellow and Die” nga sinuwat ni Alex Fernando ug ang mga bayolenteng sangka sa mga raliyista ug Marcos loyalists nakuhaan og mga hulagway sa mga photographers nga sila si Nick Galino ug Ariel Antolin. Ang estorya nagsentro sa usa ka Steve Salcedo nga gidemalas nga nagsuot og yellow nga t-shirt samtang padulong na untang molarga ngadto sa Saudi Arabia aron manarbaho apan naatlan tungatunga sa kagubot ug gitabangan og kulata sa mga pro-Marcos. Si Salcedo namatay diha sa Philippine General Hospital (PGH) apan tungod sa maong estorya ug mga hulagway nga nakuha sa The Philippine Star nasubay ug nadakpan ug nasilotan pagkabilanggo ang lima ka mga tawong lakip ang usa ka commercial model nga si Ann Ferrer nga nakuha sa camera nga nagtinabangay og kulata kang Salcedo. (BANAT NEWS)