CEBU, Philippines - Tungod sa nagkadaghang kaso sa mga nasakit og dengue gideklarar sa mga tinugyanan sa panglawas sa siyudad sa Sugbu nga dunay “dengue outbreak” sa 25 ka mga barangay sa siyudad.
Sumala pa sa pangulo sa Cebu City Health Department nga si Dr. Stella Ygonia nga subsob karon ang gibuhat nila nga kampanya batok sa maong sakit ilabi na nga nagsagunson ang uwan.
Gitataw niya nga bisan dili panahon sa ting-uwan, walay undang ang ilang pangampanya batok sa dengue.
Una na nga gipahibalo sa maong departamento sa miaging adlaw nga kapin sa 100% ang pagsaka sa kaso sa dengue dinhi sa dakbayan sa Sugbo itandi sa miaging tuig.
Base sa rekord sa City Epidemiology Statistics and Surveillance Unit (CESSU) sa City Health Department, moabot ngadto sa 1,677 ka kaso sa maong sakit sukad niadtong Enero hangtod sa unang bahin sa Hulyo niining tuiga ug pito na usab ang gikatahong namatay. Ang kasamtangang gidaghanon sa mga nataptan sa dengue mas taas kun itandi sa mga kaso sa susamang period sa miaging tuig nga adunay 765 ka kaso samtang walo ang patay.
Ang 25 ka barangay nga gideklarar nga may “dengue outbreak” naglangkob sa Kalubihan, Cogon Ramos, Sto. Niño, Bacayan, Sambag 1, Sta. Cruz, San Nicolas, Zapatera, Pit-os, San Antonio, Kamagayan, Pasil, Kamputhaw, Pahina Central, Ermita, Tinago, Sapangdaku, Inayawan, Suba, Guadalupe, Capitol Site, T.Padilla, Mabolo, Pahina-San Nicolas ug Cogon Pardo .
Sa talaan sa regional Department of Health -RESU sa ilang Dengue Current Situation 29th Morbidity Week (July 15-21, 2012) 25 na ka tawo ang nakalas sa maong sakit sugod niadtong Enero hangtud Hulyo 14 ning tuiga gikan sa 4,574 ka mga kaso sa tibuok Central Visayas.
Sa ilang talaan ang Cebu City mao gihapoy nag-una sa dunay labing daghan og kaso nga may 2,098 kaso ug 10 na ang namatay sa samang period, sunod niini ang Dumaguete City (291 kaso, usa ang patay), Minglanilla (221 kaso, usa ang patay), Lapulapu City (201 kaso, tulo ang patay), Talisay City (184 kaso), Liloan (119 kaso, usa patay), Mandaue City (88 kaso), Bayawan City (82 kaso), Toledo City (67 kaso).
Sumala pa ni Ygonia nga nag-preparar na ang iyang buhatan nga makapangayo og calamity fund sa siyudad aron magamit sa kampanya.
Samtang si Mayor Michael Rama miawhag sa publiko nga manglimpiyo kanunay sa ilang palibot aron malikayan ang pagdagsang sa mga lamok nga maoy nagdala sa maong sakit. (EIM) (BANAT NEWS)