CEBU, Philippines - Nagkinahanglan ang Cebu City Medical Center og P500 milyones nga budget alang sa tuig 2013 alang sa pagpalapad pa sa ilang operasyon.
Ang budget sa CCMC karong tuiga moabot lang ngadto sa P279 milyones nga sumala pa sa administrador sa CCMC nga si Gloria Duterte matarong nilang gigasto aron maserbisyohan ang mga pasyente.
Si Mayor Michael Rama mibisita kagahapon sa CCMC nakamatikod hinuon nga nagkulang ang bentilasyon sa CCMC tungod kay alimuot kini ilabi na diha sa pediatric ward.
Nagplano si Rama nga iyaha gyung pagahinan og pundo aron mabutangan og air-conditioning units ang pediatric ward sa sunod tuig nga budget. Nakadayeg hinuon ang mayor sa kalimpiyo na sa maong tambalanan nga kaniadto lago kayo ug abog, ingon man ang inisyatibo sa mga doktor nga nangandam og extension rooms alang sa dugang pasyente kung gikinahanglan.
Samtang wala mausab ang plano ni Rama nga himoan og annex building ang CCMC diha sa atbang niini nga mao ang nahimutangan karon sa rehiyonal nga buhatan sa Bureau of Fire Protection -7, bisan pa man nangangkon ang BFP nga duna silay mapakitang dokumento nga ang maong luna ilaha. (BANAT NEWS)