CEBU, Philippines - Ang tanang mga miyembro sa Philippine Health Insurance Corp. (PhilHealth) makapahimus na sa bag-ong gilusad nila nga programa nga mao ang Case Type Z Benefit Package.
Mao kini ang gibutyag ni manlalaban Karisma Agraviador, ang pangulo sa Public Affairs Unit sa Philhealth-7 atol sa tulomanon sa Association of Government Information Officers (AGIO) Forum nga gipalanog sa DYMR kagahapon.
Sa maong forum kauban usab ni Agraviador si Dr. Avril Tiu, ang Medical Specialist, Benefits Administration Section sa Philhealth 7 kinsa mipasabot sa mga membro sa Philhealth nga sa pagkakaron upat pa ka mga gitawag nila nga “catastrophic” o sakit nga mahalon kaayo og bayad sa hospital ug mga tambal ang kwalipikado sa maong programa.
Gipaila ni Tiu ang maong mga sakit nga mao ang leukemia sa mga bata, breast cancer, prostate cancer ug kidney transplant.
Matud ni Tiu nga ang maong mga matang sa sakit kun masugatan sa membro sa Philhealth mabuslot ang bulsa sa hingtungdan sa ginastuay niini. Maoy hinungdan matud pa niya nga milusad og maayong programa ang Philhealth bahin niini aron makatabang sa hingtungdan sa pagpagaan-gaan sa ilang problema.
Hinuon gipahayag ni Tiu nga sa pagkakaron niining upat ka sakit nga anaa sa kategoriya nga “Z” duha pa lamang ang direktamente nga kahatagan og hinabang sa Philhealth.
Kini mao ang breast cancer ug kidney transplant, diin alang sa nahauna o ang breast cancer, mohatag ang Philhealth og P100,000 sulod sa usa ka tuig nga pagpatambal sa pasyente sa tambalanan nga gitudlo sa maong ahensya nga kapatambalan sa pasyente.
Samtang sa kidney transplant mogahin ang PhilHealth og P650,000 alang sa tulo ka tuig nga pagpatambal sa pasyente.
Gitin-aw usab ni Tiu nga ang matag pasyente nga makapahimus sa maong programa makapatambal lamang sa Vicente Sotto Memorial Medical Center (VSMMC) ang bugtong hospital nga gi-kontrato sa Philhealth dinhi sa rehiyon 7.
Sa samang higayon matud pa ni Tiu nga matag pasyente nga makapahimus sa Case Type Z Benefit Package wala nay bayran bisan usa ka diyot sa hospital.
Samtang iyang gidugang nga ang tanang gaan-gaan nga sakit sa mga membro sa Philhealth daan nang gisiguro sa Philhealth ang gasto niini sa pagpatambal.
Iyang gidugang nga sukad ilusad nila ang bag-o nilang programa, usa na ka buwan ang milabay wala pay misuway sa pagpahimus niini tungod usab sa kahigpit sa ilang screening o pagsusi sa pasyente kun mo-qualify o mosakar ba ilang mga panukdanan alang niadtong puwedeng makapahimus niini.
Samtang si Dina Cinches ang Public Relations Officer sa Philhealth 7 miawhag usab sa wala pa mamembro sa maong pasiguro nga magpamembro na ug maningkamot nga makabayad pirme sa binuwan nga premium niini. - BANAT NEWS