CEBU, Philippines - Si Cordova Mayor Adelino "Addy" Sitoy ug kanhi Kongresista Nerisa Soon Ruiz sa ika-unom nga distrito wala pa makahukom kun molayat ba sila ngadto sa Liberal Party (LP).
Hinuon matud pa sa mayor nga girespetohan niya ang iyang anak nga si Provincial Board Member Arliegh Sitoy kinsa mibalitok na karon ngadto sa LP.
Apan sa iyang bahin si Mayor Sitoy nagkanayon nga hangtod karon wala pa siya makahukom sa pagbalhin og laing partido kay lig-on man ang iyang pagsalig sa One Cebu Party. Hinuon karong mitabok na sa LP si Cong. Luigi Quisumbing ug si Consolacion Mayor Alegado natay-og gyud ug mikibra ang puwersa sa One Cebu, sumala pa ni Sitoy.
Samtang si kanhi Cong. Ruiz sa iyang bahin nagkanayon nga wala pa siya makadawat og tanyag gikan sa LP apan sa iyang pagdawat sa tanyag ni Mandaue City Mayor Jonas Cortes nga himoon siyang consultant of health matters sa Mandaue, iya kining gidawat sanglit ganahan siya nga moserbisyo sa katawhang Mandauehanon.
Mipadayag usab si Ruiz og kalipay sa panaghiusa karon sa mga dagkong political clan sa dakbayan sa Mandaue nga nagkaabot atol sa pagsaulog sa adlaw’ng natawhan ni Mayor Cortes sa milabayng Biyernes ug nagsimbolo sa kahiusahan alang sa kalambuan sa dakbayan sa Mandaue. (BANAT NEWS)