CEBU, Philippines - Dugang mga armas, barko, abyon ug ingon man mga panimalay alang sa mga sakop sa militar ug kapolisan ang gipasalig ni Presidente Benigno Simeon Aquino III atol sa iyang State of the Nation Address kagahapon.
Gipahibalo ni Aquino nga dili isibog sa Pilipinas ang katungod niini sa teritoryo partikular na ang isyu sa West Philippine Sea .
Matud pa ni Aquino napupos ang kinse ka tuig nga AFP Modernization Program sugod pa sa nanglabay’ng administrasyon nga gamay ra kaayo ang nakab-ot nga kalampusan.
Apan sa iyang pamunoan usa ka tuig ug pito ka buwan nakagahin na ang gobiyerno og P28 bilyones nga pundo nga gipamalit karon og modernong mga gamit sa militar ug magpadayon kini hangtud mapupos ang iyang termino.
Karong tuiga 2012 gikatakdang moabot ang ikaduhang Hamilton Class nga panganlan og BRP Ramon Alcaraz; upat ka combat utility helicopters; ug sa sunod tuig dugang duha ka C-130 lift transports, 10 attack helicopters, duha ka naval helicopters, usa ka frigate; 22 ka UH-1H helicopters ug ang ekipo sa paghimo og mga bala ug uban pa.
Sa habig sa kapolisan, gikatakdang mopalit og dugang 74,600 ka mga armas ang gobiyerno aron adunay magamit ang mga polis batok mga kriminal. Sumala pa ni Aquino 45 porsiyento lang sa mga polis ang dunay mga armas dihang siya milingkod niadtong 2010.
Gidayeg usab ni Aquino ang kapolisan sa pagkunhod sa krimen komparar sa nakalabay’ng katuigan.
Samtang 22,000 ka housing na ang napang apud-apod sa kasundaluhan ug kapolisan.
Sa habig sa edukasyon, gidugangan ang pundo sa state universities ug colleges gikan sa P177 bilyones niadtong 2010 sa nakalabay’ng administrasyon himuon kining P292 bilyones sa 2013. Apan kinahanglang maayong kalidad ang produktong mga estudyante ang bunga niini subay sa SUC Reform Roadmap sa CHED.
Matud pang Aquino kung duna pay mosaway niini ug dili makakita sa kadako sa gidugang nga pundo alang niini iyahang tambagan ang maong mga tunghaan nga pakuhaon og remedial classes sa matematika ang mga padayong manaway sa gobiyerno ug gidasig silang kinahanglang di sila mo-absent.
Samtang masaligon si Aquino sa DepEd nga karong 2013 makompleto na ang 66,800 nga kakulangon sa lawak-saringan nga gibilin sa milabay’ng administrasyon; ang kakulangon sa 2,573,212 nga lingkuranan una pa mapupos ang 2012 ingon man ang kakulangon nga 61.7 milyones nga libro.
Miani og positibong reaksyon ang gitawag niyang “tuwid na daan” sa repormarng gipatuman nga naglakip sa agrikultura, social services, imprastaktura, negosyo, siyensya, panglawas ug uban pa. Si kanhi executive judge RTC Branch 13 Meindrado Paredes dihang nahinabi sa Banat News mihulagway nga positibo kaniya ang SONA ni Aquino apan nagkulang kini sa paghisgot kabahin sa mga ‘extrajudicial killing, violation of human rights, journalist killing.’ (BANAT NEWS)