CEBU, Philippines - Gituohan nga labing maapingan ang mga tinubdan sa tubig ug kasapaan dinhi sa lalawigan karong may tukma na nga mga sumbanan ug reglamento nga angay tumanon sa matag lokal nga kagamhanan.
Ang mga tukmang paagi ug mga sistema sa pag-atiman sa mga tinubdan sa tubig ug kasapaan maoy gituki atol sa seminar workshop nga gipahigayon didto sa Hagnaya Beach Resort sa lungsod sa San Remegio sa miaging semana.
Gani mayoridad sa 70 ka mga mitambong sa maong seminar nagagikan sa Local Government Units (LGU), National Government Agencies (NGA), academe, Non-Government Organizations (NGO) ug mga magpapatigayon nga maoy miorganisar sa strategic and action planning workshop alang sa Central Cebu River Basins Management Council (CCRBMC)
Ang CCRBMC sa Department of Environment and Natural Resources (DENR-7) maoy miumol sa maong aktibidad nga gitumong sa pag-ila sa angay ug tukma nga mga kalihokan ug mga programa, mga plano nga gikinahanglan kaayo alang sa pagpreserbar sa mga tinubdan sa tuig ug kasapaan.
Matud pa ni Isabelo R. Montejo, DENR-7 Regional Executive Director nga ang gitutokan nila karon mao ang pagdesinyo og mga programa nga mosuporta sa integrated watershed management isip stratehiya alang sa rehabilitasyon, proteksyon ug konserbasyon sa mga kasapaan.
Sumala pa usab ni Father Tito Soquino sa Basilica Minore del Sto Niño nga maoy namulong hulip kang Archbishop ug CCRBMC Chairman Jose S. Palma nga gikinahanglan ang usa ka hayag nga resulta alang sa action planning workshop.
Dugang pa niya nga gikinahanglan usab nga ibutang sa lugar ang maong mga programa nga makasanta sa bug-at nga epekto sa mga katalagman nga moigo sa mga kasapaan sa lalawigan.
Kini pinaagi sa paghatag og kaalam sa matag komunidad og hiantigohan sa tukmang pagresponde sa panahon nga moabot ang mga katalagman nga mogusbat sa kalikopan.
Pipila niini mao ang pagpasiugda og sistema sa pagdaginot sa tubig sama paggama og water impounding, rainwater harvesting ug water recycling.
Ang Regional Development Council (RDC-7) milig-on sa RDC Resolution No. 47 series of 2011 nga misuporta sa CCRBMC tungod sa pakigtambayayong niini sa pagdumala,rehabilitasyon ug pagprotehir sa mga kasapaan sa Central Cebu. (BANATNEWS)