CEBU, Philippines - Gisaway ni Daanbantayan Mayor Ma. Luisa Loot ang State of the Province Address sa kanhi niya higala nga si Gob. Gwendolyn Garcia niadtong Biyernes.
Sama sa gihimo sa mga sakop sa Barug Alang sa Kauswagan ug Demokrasya sa ikalimang distrito sa lalawigan sa Sugbo, si Loot wala usab nitambong sa Sopa gawas lang sa iyang anak nga si Bokal Sun Shimura.
Sa interbyu sa DyDD Bantay Radyo, giangkon ni Loot nga nakadawat siya ug ang mga barangay kapitan sa imbitasyon sa Kapitolyo butang nga nakapa-surpresa kanila sanglit duha ka tuig na nga wala sila imbitaha sa samang kalihukan.
Si Loot ug anak nga si Shimura nagkauban sa One Cebu Party nga gipanguluhan ni Garcia sa eleksiyon sa 2007 ug 2010.
“Akong giingnan ang mga kapitan unsa pa ma’y kapuslanan nga molili ta sa iyang SOPA nga katapusan naman niya,” matud pa ni Loot nga ang gipasabot ang termino sa gobernador.
Matud pa niya nga gisalikway na ni Garcia ang lungsod sa Daanbantayan ug wala na kini hatagi og mga kaayohan.
“Para unsaon man ang SOPA, para lang pakitang-tao nga daghan gihapon siya og mga opisyal nga mopakpak niya, mohangad niya or moingon nga naa pa siya’y daghang supporters para ipakita niya sa atong Vice President, aron ipakita niya sa kang Erap Estrada nga kanhi natong presidente ug kinsa pa nang iya mga kauban sa Senate sa iyang pagdagan?,” matud pang Loot.
Kung politika ang hinungdan sa wala pagtambong sa mga sakop sa Bakud, parehong katarungan usab ang giluwatan ni Loot.
“Pala-palahan na pud mi, ulog-ulogan na pud mi para mosuporta mi nila?,” sumala pa ni Loot. (BANAT NEWS)