CEBU, Philippines - Patay ang usa ka tinun-an sa 2nd year high school samtang kritikal ang kahimtang sa 16-anyos nga drayber sa gisakyan niining traysikad human sila madasmagi og trak de karga diha sa barangay Guiwanon sa lungsod sa Argao niadtong Huwebes sa alas 7:30 sa gabii. Ang namatay mao si Nikko Mark Aliponga,13, ug 2nd year high school sa lungsod sa Argao samtang talandugon si Justin James Dolosa,16, pulos molupyo sa Bagong Bayan lungsod sa Sibonga.
Samtang gibalhog na ang drayber sa trak de karga nga Mitsubishi Canter dunay plaka nga JDX-831 gipanag-iya sa Cold Link Asia Logistic nga nagbase sa Tabuk siyudad sa Mandaue nga si Walter Patindol, 34, taga barangay Pitogo lungsod sa Consolacion.
Matud ni PO2 Dionisio Traumata, desk officer sa Argao Police dihang nahinabi sa Banat News paingon ang mga biktima sa amihanan ug kasugat ang maong trak.
Apan pag-abot sa maong lugar gikatahong miliko ang traysikad padulong sa gisubay nga lane sa trak hinungdan sa panagsampak sa duha ka matang sa sakyanan ug nangalagpot ang mga biktima. Ang mga tawo nga nakasaksi daling mitabang sa duha ug gidala sa Isidro Kintanar Memorial Hospital sa lungsod sa Argao apan gideklarar nga dead on arrival si Aliponga samtang gi-transfer sab sa tambalanan dinhi sa dakbayan sa Sugbo ang sikad-sikad drayber.
Si Patindol kinsa gitanggong na sa karsel sa kapolisan gikatakdang pasakaan og kasong reckless imprudence resulting to homicide ug serious physical injury. (Darrel A. Carumba/EIM)