CEBU, Philippines - Nalandig sa tambalanan ang duha ka lalaki human kini pusila sa wala hiilhing kriminal didto sa barangay Calajoan, lungsod sa Minglanilla kagahapon sa kaadlawon.
Ang mga biktima nailhan nga sila si Marvin Villarosa, 24, drayber sa habal-habal nga taga barangay Lagtang, dakbayan sa Talisay, ug si Luis Ababa, 39, taga barangay Sambag, dakbayan sa Naga.
Si PO2 Abelardo Biton, desk officer sa Minglanilla Police Station nagkanayon nga nagsakay ang mga biktima sa motorsiklo nga gimaneho ni Villarosa.
Apan kalit lamang kining gipamusil sa wala hiilhing kriminal ug nabulit sa mga samad sa bala ang ilang kalawasan.
Gipanghatod dayon ngadto sa Vicente Sotto Memorial Medical Center sa dakbayan sa Sugbo ang mga biktima samtang padayon pang gipangita sa kapolisan ang mga kriminal. (BANAT NEWS)