CEBU, Philippines - Si Bise Mayor Alan Bucao sa dakbayan sa Talisay mihangyo sa provincial director sa Department of Trade and Industry (DTI) nga ma-deputize ang City of Talisay-Traffic Operation Development Authority (CT-TODA) niining higpit nga pagpatuman sa helmet law. Matud pa ni Bucao nga importante kaayo ang maong katungod nga ikatahas usab sa DTI ngadto sa taga Talisay aron may igo kining katakus sa pag-inspection sa mga helmet nga angayang papitlan og sticker nga ICC ug PS .
Ang maong hangyo gihimo ni Bucao pinaagi sa suwat nga iyang gipadala ngadto sa buhatan ni DTI Provincial Director Nelia Navarro nga nagtanyag og dakong tabang sa mga kawani sa DTI pag-screen sa mga helmet. Ang bise mayor nagkanayon nga ang buhatan sa CT-TODA konbenyenti kaayo alang sa mga motorista nga gikan sa habagatan kung anha na sila magpa-inspection sa ilang mga helmet.
Ang mga personnel sa CT-TODA andam usab nga mopaubos sa mga bansay-bansay ug orientation sa DTI isip mga agent.
Nanghinaot si Bucao nga ma-decentralize sa DTI ngadto sa Talisay ang pagpamutang og mga sticker sa mga helmet aron dili malangan ang gikatakdang implementasyon sa helmet law nga gitakdang sugdan karong Agusto 1, 2012. - BANAT NEWS