CEBU, Philippines - Nag-inusara lang sa karsel si Junjun Cabando “Dionisio Cabatingan” kini tungod usab kay gikonsiderar man siya nga high profile nga klase sa piniriso.
Ang jail warden sa City jail nga si Supt. Johnson Calub, mibutyag nga limitado lang ang pagsulod-gawas ni Cabando sa iyang karsel ug kun mogawas man ugali kini aduna gyuy mo-escort nga gwardiya. Gikompirmar ni Calub nga dunay mga report nga ilang nadawat nga ang mga grupo sa mga tulisan dinhi sa Sugbu nga nangapriso na sa CCJ dili gyud malipay nga dunay masagol kanilang sakop sa Mindanao robbery gangs.
Tungod kay giisip nga high-risk inmate si Cabando pakuyogan kini og mas daghang jailguards sa matag hearing niini sa korte. Ang hinigugma ni Cabando nga si Merlyn Laguitao atua na usab sa womens section sa city jail. Ang hepe sa kapolisan sa City Intelligence Branch, Romeo Santander mibutyag nga walay angayang kabalak-an si Laguitao sulod sa city jail kini tungod kay atimanon man usab siya sa mga doktor bisan siya mabdos.
Samtang ang legal counsel ni Rolien Castro nga si Atty. Rameses Villagonzalo mihangyo sa buhatan ni Santander nga dili lang unta ipunon si Castro ug Cabando kini tungod usab sa hangyo sa iyang kliyenti. Depensa pa ni Castro nga nahadlok lang siya nga mag-abot sila ni Cabando tungod kay gikontrahan siya niini dihang usa ka kaso nga ilang gikalambigitan kaniadto siya ray nakagawas.
Apan si Santander miklarong dili sila maoy angayang duolon kabahin niini sanglit ang Bureau of Jail Management and Penology (BJMP) mao lang dunay mahimo niini. (BANAT NEWS)