CEBU, Philippines - Ang mga sakop sa Cebu City Traffic Operations Management (CITOM) miawhag sa Department of Transportation and Communications (DOTC) nga ioktaba ang pagpatuman sa bag-ong balaud nga naglatid nga ang mga drayber ug pasahero sa motor mogamit lang sa tukma nga helmet.
Si kanhi Konsehal Sylvan “Jack” Jakosalem nga maoy chairman sa CITOM Board nagkanayon nga ipadala dayon nila sa DOTC ang resolusyon nga nag-awhag nga dili dayon ipatuman ang Republic Act 10054 unya sa Agosto 1.
Ang maong balaud naglatid nga kadtong masakpan nga magmaneho ingon man magsakay og motorsiklo nga ang helmet dili mao base sa gilatid sa Department of Trade and Industry (DTI), dakpon sila ug multahan og P1,500 sa unang higayon. Sa ikaduha nga pagkasikop, ang multa mosaka ngadto sa P3,000 ug P5,000 sa ikatulo nga higayon. Sa ikaupat nga pagkasikop sa mao gihapon nga drayber, ang multa moabot na og P10,000 ingon man rebokahon na ang iyang lisensya.
Mahibaw-an kun kapila na madakpi ang usa ka drayber kay makita kini sa on-line records sa Land Transportation Office.
Matud sa mga sakop sa CITOM Board nga dili maayo nga ipatuman dayon ang maong balaud kay ang mga kabus nga pamilya maglisud gani sa pagpalit sa mahal kaayo nga crash helmet nga gilatid sa DTI.
Ang labing barato nga helmet nga aprobahan sa DTI magkantidad og P1,500. Daghang mga helmet nga barato ug susama ra og porma sa gilatid sa DTI, apan gihimo kini sa ordinaryo nga plastik mao nga dili kini aprobahan og hatagan og sticker.
Hangtud karon kapin pa lang sa 40 ka brands sa mga helmet ang giaprobahan sa DTI nga mahimong gamiton.
Si Jakosalem nagkanayon nga ang laing paghasul-hasol sa mga kabus mao ang tag P100 nga registration fee sa helmet ug sa P1.25 nga bayranan sa sticker nga ipapilit sa helmet.
Si Koronel Melvin Ramon Buenafe, direktor sa kapolisan dinhi sa dakbayan ug sakop sa CITOM Board, namahayag nga silang mga polis mapugos sa pagpatuman sa balaud.
Apan miapil si Buenafe, isip sakop sa CITOM Board, nga mopirma sa resolusyon nga nag-awhag nga iuswag usa ang pagpatuman sa bag-ong helmet law.
Si LTO-7 regional director Raul Aguilos namahayag hinoon nga kadtong mga magsakay og motor nga ang problema mao ra nga wala sila’y sticker, dili ra sila dakpon hangtud sa Disyembre.
Apan gipasabot ni Aguilos nga kinahanglan nga ang ilang mga helmet nakatuman na sa gilatid sa balaud. Ang helmet nga gilatid sa balaud mao kadtong matabunan ang dunggan sa tawo bisan og wala maapil ang suwang.
Kini maoy gitawag og “half face” helmets. Ang full-face helmets mao kadtong matabunan ang suwang sa nagsul-ob.
Si Mayor Michael Rama miingon nga supak siya nga ipatuman ang balaud dinhi sa dakbayan kay makapadasig pa kini sa mga kriminal kay matabunan man ang ilang panagway. (BANAT NEWS)