CEBU, Philippines - Gikatakda karong Martes atol sa regular nga sesyon sa konseho sa dakbayan sa Talisay ang pagduso ni Bise Mayor Alan Bucao og ordinansahon kabahin sa dili pagdagmal sa bata.
Si Bise Mayor Alan Bucao kinsa maoy nangamahan sa maong ordinansahon mibase sa 1987 Constitution nga nagmandar sa pagdepensa sa katungod sa kabataan batok sa pangabuso.
Gawas niini gibasehan usab niya ang tulobagon sa nasud pagtuman sa gikasabotan sa United Nations Convention bahin sa pagtahod sa katungod sa kabataan nga kinahanglan silang atimanon ug proteksiyonan pinaagi sa ilang mga ginikanan o kaha nagsagop kanila. Sa Section 1 sa maong balaodnon gibutangan og titulo nga “Positive and Non-Violence Discipline of Children Ordinance of the City of Talisay, Cebu”.
Ang Section 2 sa maong balaodnon nagbutyag sa katuyoan niini aron tumanon sa mga ginikanan, magtutudlo, nagsagop og ubang mga tawo nga responsabli sa pagprotiher sa katungod sa kabataan.
Sa Section 3 mao ang “Prohibited Acts or Punishment” diin ang mga nag-atiman sa bata higpit nga gidid-an sa pagdagmal niini. Gitataw usab sa maong ordinansahon nga kadtong molapas niini dili makalikay sa tukmang silot nga ipahamtang kanila segun sa gisitar sa 1987 Constitution. (BANAT NEWS)