CEBU, Philippines - Kaso nga murder ang atubangon sa usa ka senior citizen nga mipusil patay sa iyang silingan sa sitio Tulay, barangay Guinsay sa dakbayan sa Danao sa miaging gabii.
Si PO3 Arnold Labini sa kapolisan sa maong dakbayan miila sa suspetsado nga mao si Bonifacio Casas Meca, 64, minyo, nga nagpuyo sa maong dapit.
Siya ang gikonpirmar nga mipusil patay ni Jose Ipil Toledo, 45, minyo, nga iyang silingan.
Si PO3 Labini nga nahinabi sa Banat News nagkanayon nga dugay na nga nagdinumtanay ang biktima ug ang suspetsado gumikan sa personal nga hinungdan.
Nagtuo usab siya nga grabi ang kasuko sa suspetsado ngadto sa biktima nga maoy hinungdan nga kalit niining gipusil ang bukobuko sa biktima gamit ang wala pa nila matino nga kalibre sa armas.
Ang biktima gihatud dayon sa mga tagtungod ngadto sa Danao Provincial Hospital diin didto kini ideklarar nga dead on arrival.
Dugang pa niya nga sa ilang pagtubag sa maong alarma sa crime scene ilang naabtan ang suspetsado nga didto sa iyang balay busa dali nila kining gisikop ug gibalhog dayon sa bilanggoan. (BANAT NEWS)