CEBU, Philippines - Naalibwag ug nasadya og kadiyot ang mga tawo diha sa gawas sa usa ka mall sa North Reclamation Area sa dakbayan sa Mandaue human usa ka tawo ang misabwag og linibong kwarta ngadto kanila nga kabahin diay sa kinawat nga P2.8 milyones.
Nasuta nga ang maong tawo dili diay usa ka “Robin Hood” kay kini gidudahang nangawat sa mismong establisamentong gialagaran nga mao ang Philippine Amusement and Gaming Corporation (Pagcor) sa Casino Filipino, Parkmall satellite branch niini.
Gipangita na karon sa kapolisan ang in-house security sa PAGCOR nga si Pascual Urian Jr., lumad nga taga Capiz ug kasamtangang nagpuyo sa barangay Cubacob sa dakbayan sa Mandaue.
Sa pasiunang imbestigasyon sa kapolisan sa dakbayan sa Mandaue pinangulohan ni Chief Insp. Michael Anthony Bastes, hepe sa Investigative and Detective Management Bureau (IDMB) sa MCPO kaadlawon nahitabo ang pagpangawat.
Sumala pa nga alas 12:50 kagahapon sa kaadlawon samtang nag-duty si Urian kinsa adunay access sa vault nga butangan sa kita sa casino kalit kining misulod didto ug giingong mikuha og binandol nga kwarta.
Human niini dali kining migawas sa exit door sa maong mall. Sumala pa ni PO2 Roldan Balimbing sa IDMB nga nahinabi sa Banat News nabantayan kini sa kaubang gwardiya nga si Violita Asigbat.
Si Asigbat nagduda sa lihok sa suspek nga nagbitbit og usa ka bag dihang kini migawas sa maong exit door hinungdan nga iyaha kining gigukod apan adto kini miagi sa daghang tawo.
Aron mabalda ang mga gwardiyang naggukod kaniya gikatahong mikuha og binandol nga kwartang tagsa ka libo, tagsa ka gatos ug tag P500 ang suspek ug gisabwag kini sa mga tawo.
Tungod sa nagpasad nga kwarta nagkaguliyang ang mga tawo sa pagpamunit niini hinungdan nga ang mga gwardiya nahunong sa ilang paggukod kang Urian ug gisuwayan pagbawi ang mga kwarta gikan sa mga tawong namunit.
Ang suspek bisan sa kakusog sa pagbunok sa ulan daling midagan sa gawas ug mipara og taksi diha sa dalan Mantawi Drive. Ang taksi gikatahong sa direksyon sa Cebu City padulong.
Ang mga gwardiya sa Pagcor daling mitawag sa kapolisan ug nangayo og backup aron mahipos og balik ang gisabwag nga kwarta ug ang uban ilahang gibawi gikan sa mga tawo nakapunit niini.
Apan P80,000 nalang ang kinatibuk-ang napunit.
Ang mga polis miadto na sa balay sa suspek apan wala na nila kini maabti pa sa Cubacob ug bisan sa laing balay nga giabangan niini sa barangay Punta Engaño sa dakbayan sa Lapulapu tungod kay giingong tulo ka adlaw na kining wala na mouli. (BANAT NEWS)