CEBU, Philippines - Namatay ang usa ka tawo nga nalumos human mosawom samtang naligo sa kadagataN sa Fantastic Island Beach sa barangay Gibitngil, lungsod sa Medellin sa miaging hapon.
Si PO3 Paquito Soon sa kapolisan sa maong lungsod nga nahinabi sa Banat News miila sa namatay nga mao si Rodito Batuegas Rosos, 38 , nga nagpuyo sa barangay Kawit sa nahisgotang lungsod. Dugang pa niya nga kuyog sa biktima ang pipila ka mga higala nga nangaligo sa maong lugar. Unya sumala ni Po3 Soon nga si Rosos misawom sa lawom nga bahin sa dagat apan wala na motunga.
Sa sinugdan nagtuo ang mga kauban nga taas kaayo og utong si Rosos nga maoy hinungdan nga wala kini motunga dayon.
Apan miabot na og usa ka oras ang kadugay nga wala na nila makita si Rosos hinungdan nga ila kining gipangita. Didto nadiskobrehan nila nga milugdang diay si Rosos sa yuta sa ilawom sa dagat nga may giladmong lima ka dupa
Gisakwat kini sa iyang mga kauban ug gidala sa daplin sa baybayon ug ilang gihatod ngadto sa Bogo Provincial Hospital sa dakbayan sa Bogo.
Dugang pa ni Po3 Soon nga si Dr. Rene Calo Palay sa maong tambalanan maoy mideklarar kang Rosos nga dead on arrival
Gituohan sa mga kauban nga gibikogan ang biktima hinungdan nga wala na kini makalangoy nga maoy nakaingon sa iyang kamatayon. (BANAT NEWS)